മലപ്പുറം: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ രണ്ടാനച്ഛനും പീഡനത്തിന് ഒത്താശചെയ്ത കുട്ടിയുടെ അമ്മയ്ക്കും 180 വര്‍ഷം കഠിനതടവ്. മഞ്ചേരി അതിവേഗ പ്രത്യേക കോടതിയാണ് പ്രതികളെ ശിക്ഷിച്ചത്. ഇരുവര്‍ക്കുമായി 11.75 ലക്ഷം രൂപ പിഴയും വിധിച്ചിട്ടുണ്ട്. പിഴ അടച്ചില്ലെങ്കില്‍ 20 വര്‍ഷം കൂടി തടവ് അനുഭവിക്കണമെന്നും കോടതി ഉത്തരവിട്ടു.
2019 മുതല്‍ 2021 വരെയുള്ള കാലയളവിലാണ് കുട്ടി പീഡനത്തിനിരയായത്. കുട്ടിയുടെ രണ്ടാനച്ഛന്‍ പാലക്കാട് സ്വദേശിയാണ്. അമ്മ തിരുവനന്തപുരം സ്വദേശിനിയും. 2019-ലാണ് യുവതി കുട്ടിയുമായി രണ്ടാംഭര്‍ത്താവിനൊപ്പം താമസം ആരംഭിച്ചത്. അന്നുമുതല്‍ രണ്ടാനച്ഛന്‍ കുട്ടിയെ പീഡിപ്പിച്ചിരുന്നതായാണ് വിവരം.
വീട്ടിലെത്തിയ ബന്ധുക്കളാണ് കുട്ടി അതിക്രമത്തിനിരയായതായി മനസ്സിലാക്കിയത്. ബന്ധുക്കള്‍ വീട്ടിലെത്തിയപ്പോള്‍ കുട്ടിയെ മുറിയില്‍ പൂട്ടിയിട്ടനിലയിലാണ് കണ്ടെത്തിയത്. ബന്ധുക്കള്‍ ചൈല്‍ഡ് ലൈനില്‍ വിവരമറിയിച്ചു. തുടര്‍ന്ന് ചൈല്‍ഡ് ലൈന്‍ അധികൃതര്‍ കുട്ടിയെ കൗണ്‍സിലിങ്ങിന് വിധേയമാക്കിയതോടെയാണ് രണ്ടുവര്‍ഷത്തെ പീഡനം പുറത്തറിഞ്ഞത്.
