സ്ഥാനാര്ത്ഥികളുടെ നിര്യാണത്തെത്തുടര്ന്ന് വോട്ടെടുപ്പ് മാറ്റിവച്ച മൂന്ന് തദ്ദേശ സ്വയംഭരണ വാര്ഡുകളിലേക്കുള്ള പ്രത്യേക തിരഞ്ഞെടുപ്പ് വിജ്ഞാപനം ഇന്ന് പുറപ്പെടുവിക്കും. തിരുവനന്തപുരം കോര്പ്പറേഷനിലെ വിഴിഞ്ഞം വാര്ഡ്, മലപ്പുറം ജില്ലയിലെ മൂത്തേടം ഗ്രാമപഞ്ചായത്തിലെ പായിമ്പാടം വാര്ഡ്, എറണാകുളം ജില്ലയിലെ പാമ്പാക്കുട ഗ്രാമപഞ്ചായത്തിലെ ഓണക്കൂര് വാര്ഡ് എന്നിവിടങ്ങളിലാണ് പ്രത്യേക തിരഞ്ഞെടുപ്പ് നടക്കുക. ഈ വാര്ഡുകളില് നിലവില് സ്ഥാനാര്ത്ഥികളായവര് വീണ്ടും പത്രിക സമര്പ്പിക്കേണ്ടതില്ല.
തിരഞ്ഞെടുപ്പ് പ്രക്രിയ പൂര്ത്തിയാകുന്നതുവരെ മൂത്തേടം, പാമ്പാക്കുട ഗ്രാമപഞ്ചായത്തുകളില് പൂര്ണമായും തിരുവനന്തപുരം കോര്പ്പറേഷനിലെ വിഴിഞ്ഞം വാര്ഡില് മാത്രമായും മാതൃകാപെരുമാറ്റചട്ടം നിലനില്ക്കും.
ഇക്കൂട്ടത്തില് കേരളക്കര കാത്തിരിക്കുന്നത് തിരുവനന്തപുരം കോര്പറേഷനിലെ വിധിക്കായാണ്. കേവല ഭൂരിപക്ഷം കടക്കാന് ബിജെപിക്ക് വിഴിഞ്ഞം വാര്ഡില് ജയിക്കേണ്ടതുണ്ട്. 101 അംഗ കൗണ്സിലില് 50 സീറ്റുകളിലാണ് ഇപ്പോള് ബിജെപി സ്ഥാനാര്ത്ഥികള് ജയിച്ചിരിക്കുന്നത്. ഇടതുപക്ഷം 29 സീറ്റിലേക്ക് ഒതുങ്ങിയപ്പോള് നില മെച്ചപ്പെടുത്തിയ യുഡിഎഫ് സീറ്റ് നില 19 ആക്കി ഉയര്ത്തി. രണ്ട് സ്വതന്ത്ര സ്ഥാനാര്ത്ഥികളും വിജയിച്ചിട്ടുണ്ട്. പൊതുസ്വതന്ത്രനെ പുറത്ത് നിന്ന് പിന്തുണച്ച് യുഡിഎഫും എല്ഡിഎഫും ചേര്ന്ന് ഭരണം അട്ടിമറിക്കാനുള്ള സാധ്യതകളെ അകറ്റി നിര്ത്തണമെങ്കില് വിഴിഞ്ഞം വാര്ഡില് ബിജെപിക്ക് ജയിക്കേണ്ടതുണ്ട്.