തിരുവനന്തപുരം: മണ്‍സൂണ്‍ കഴിയുന്നതിനാല്‍ ട്രെയിനുകളുടെ വേഗതയിലും മാറ്റം വരും. ഇന്ന് മുതല്‍ 2026 ജൂണ്‍ 15 വരെ ഇനി കൊങ്കണ്‍ വഴിയുള്ള ട്രെയിനുകള്‍ 110-120 കിലോമീറ്ററിലാണ് ഓടുക. കൊങ്കണ്‍ പാതയില്‍ മണ്‍സൂണ്‍ സമയങ്ങളില്‍ ട്രെയിനിൻ്റെ വേഗത 40-75 കിലോമീറ്ററാണ്. മഴയിലുണ്ടാകുന്ന മണ്ണിടിച്ചില്‍ സാധ്യത കണക്കിലെടുത്താണ് മാറ്റങ്ങള്‍ വരുത്തുന്നത്.
പുതിയ സമയക്രമം വരുന്നതോടെ എറണാകുളം-നിസാമുദ്ദീൻ മംഗള എക്സ്പ്രസ് (12617) മൂന്ന് മണിക്കൂറോളം വൈകി പുറപ്പെടുമെന്നാണ് റെയില്‍വേ അറിയിച്ചിരിക്കുന്നത്. നിലവില്‍ എറണാകുളത്തുനിന്ന് രാവിലെ 10.30ന് പുറപ്പെടുന്ന ട്രെയിൻ ഇനി ഉച്ചയ്ക്ക് 1.25നാകും യാത്ര ആരംഭിക്കുക.
അതേസമയം, നിസാമുദ്ദീൻ-എറണാകുളം മംഗള (12618) നിലവിലോടുന്ന സമയത്തില്‍ നിന്ന് വ്യത്യസ്തമായി ഒരുമണിക്കൂർ നേരത്തെ എത്തിച്ചേരും. രാത്രി 10.35ന് മംഗളൂരുവില്‍ നിന്ന് പുറപ്പെടുന്ന ട്രെയിൻ ഷൊർണൂരില്‍ 4.10ന് എത്തിച്ചേരും.
ലോകമാന്യതിലക്- തിരുവനന്തപുരം നേത്രാവതി എക്സ്പ്രസ് (16345) ഒന്നര മണിക്കൂർ നേരത്തെ എത്തിച്ചേരും. തിരുവനന്തപുരം-ലോകമാന്യതിലക് നേത്രാവതി എക്സ്പ്രസ് രാവിലെ 9.15ന് പുറപ്പെട്ട് എറണാകുളം ജംക്‌ഷനില്‍ ഉച്ചയ്ക്ക് 1.45ന് എത്തും. കോഴിക്കോട്ട് വൈകിട്ട് ആറിന് എത്തും.
മറ്റ് ട്രെയിനുകളുടം സമയക്രമം ഇങ്ങനെ
എറണാകുളം-അജ്മീർ മരുസാഗർ-12977 രാത്രി 12.12ന് കോഴിക്കോട്ടെത്തും.
തിരുവനന്തപുരം- ഭാവ്നഗർ (19259) രാത്രി 12.07ന് കോഴിക്കോട്ടെത്തും.
എറണാകുളം-ഓഖ ( 16338) രാത്രി 12.07നാണ് എത്തിച്ചേരുക.
തിരുവനന്തപുരം-വെരാവല്‍ (16334) രാത്രി 12.07നും കോഴിക്കോട്ടെത്തും.
തിരുവനന്തപുരം- ചണ്ഡീഗഢ്‌ (12217) വൈകിട്ട് 4.27ന് കോഴിക്കോട്ടെത്തും.
പുറപ്പെടുന്ന സമയക്രമം
എറണാകുളം നിസാമുദ്ദിൻ മംഗള എക്സ്പ്രസ് ( 12617) എറണാകുളം ജംക്‌ഷനില്‍ നിന്ന് ഉച്ചയ്ക്ക് 1.25നു പുറപ്പെടും.
തിരുവനന്തപുരം ലോക്മാന്യതിലക് നേത്രാവതി എക്സ്പ്രസ് (16346) തിരുവനന്തപുരം സെൻട്രലില്‍ നിന്നു രാവിലെ 9.15നു പുറപ്പെടും.
എറണാകുളം -പുണെ സൂപ്പർഫാസ്റ്റ് എക്സ്പ്രസ് (22149) രാവിലെ 2.15ന് എറണാകുളം ജംക്‌ഷനില്‍ നിന്ന് പുറപ്പെടും.
വെരാവല്‍ വീക്ക്‌ലി എക്സ്പ്രസ് (16334) തിരുവനന്തപുരം സെൻട്രലില്‍ നിന്ന് വൈകിട്ട് 3.45ന് പുറപ്പെടും.
മുംബൈ എല്‍ടിടി ഗരീബ് എക്സ്പ്രസ്(12202) തിരുവനന്തപുരത്ത് നിന്ന് രാവിലെ 7.45ന് പുറപ്പെടും.