ഇന്ത്യയിൽ പരമ്പരാഗതമായി ഉപയോഗിച്ച് വരുന്ന ആയുര്‍വേദ പാനീയങ്ങളിലൊന്നാണ് ഗോള്‍ഡ് മില്‍ക്ക് അഥവാ മഞ്ഞൾ പാൽ. നിരവധി ആരോഗ്യഗുണങ്ങള്‍ ഉള്ളതിനാല്‍ അടുത്ത കാലത്ത് ഈ പാനീയത്തിന് വലിയ തോതിലുള്ള പ്രചാരം ലഭിച്ചിട്ടുണ്ട്. പോഷകങ്ങള്‍ ധാരാളമായി അടങ്ങിയിട്ടുള്ള പാനീയം കൂടിയാണിത്. ആരോഗ്യ സംരക്ഷണത്തിനായി നൂറ്റാണ്ടുകളായി ഇന്ത്യയില്‍ ഉപയോഗിച്ചു വരുന്ന പാനീയങ്ങളില്‍ ഒന്നു കൂടിയാണിത്.
ആന്റ്ഓക്‌സിഡന്റുകളാല്‍ സമ്പന്നമായ മഞ്ഞള്‍ പാല് പതിവായി കുടിക്കുന്നത് കോശങ്ങളുടെ ആരോഗ്യം മെച്ചപ്പെടുത്തും. ശരീരത്തിലെ നീര്‍ക്കെട്ടുകള്‍ ഒഴിവാക്കാന്‍ മഞ്ഞള്‍ പാല് സഹായിക്കുമെന്ന് കണ്ടെത്തിയിട്ടുണ്ട്. ഇതിന് പുറമെ വയറിനുള്ളില്‍ അസ്വസ്ഥകള്‍ നീക്കി ദഹനം മെച്ചപ്പെടുത്താനും ഈ പാനീയം സഹായിക്കുന്നു. സ്ഥിരമായി മഞ്ഞള്‍ പാല് കുടിക്കുന്നത് സന്ധി വേദന പരിഹരിക്കുകയും സന്ധി വാതമുള്ളവര്‍ക്ക് ആശ്വാസം നല്‍കുകയും ചെയ്യുന്നു.
രാത്രിയില്‍ കിടക്കുന്നതിന് മുമ്പ് ഇത് കുടിക്കുന്നത് പതിവാക്കിയാല്‍ ശരീരവേദനകളില്‍ നിന്ന് ആശ്വാസം നല്‍കും. മഞ്ഞള്‍ പിത്തരസം ഉത്പാദനം വര്‍ധിപ്പിക്കുകയും ഇത് ദഹനത്തിന് സഹായിക്കുകയും ചെയ്യും. മഞ്ഞള്‍ പാല് ദിവസവും കുടിക്കുന്നത് വയറിനുള്ളിലെ അസ്വസ്ഥതകള്‍, ഗ്യാസ്ട്രബിള്‍, ദഹനക്കേട് എന്നിവമൂലമുള്ള ബുദ്ധിമുട്ടുകള്‍ കുറയ്ക്കാന്‍ സഹായിക്കും.
