'ബേസില്‍ ശാപ'മാണ് ഇപ്പോള്‍ സോഷ്യല്‍ മീഡിയയിലെ ട്രെന്റ്. കഴിഞ്ഞ വര്‍ഷം സഞ്ജു സാംസണിന് ബേസില്‍ ജോസഫ് കൈ കൊടുത്തപ്പോള്‍, അത് ശ്രദ്ധയില്‍പ്പെടാതെ പൃഥ്വിരാജിനോട് പോയി താരം സംസാരിച്ചതായിരുന്നു എല്ലാത്തിനും തുടക്കമായത്. പിന്നീട് ഇങ്ങോട്ട് മമ്മൂട്ടി അടക്കമുള്ളവര്‍ 'ബേസില്‍ ശാപ'ത്തില്‍ അകപ്പെട്ടത് ഏവരും കണ്ടതാണ്.
ഈ ക്ലബ്ബിലേക്കിപ്പോള്‍ വിദ്യാഭ്യാസ മന്ത്രി വി. ശിവന്‍കുട്ടിയും എത്തിയിരിക്കുകയാണ്. ഇതിന്റെ വീഡിയോ കഴിഞ്ഞ ദിവസം സോഷ്യല്‍ മീഡിയയില്‍ തരംഗമായിരുന്നു.
കലോത്സവ സമാപന വേദിയില്‍ വച്ച് ആസിഫ് അലിക്ക് മന്ത്രി കൈ കൊടുത്തെങ്കിലും അത് നടന്‍ ശ്രദ്ധിക്കാതെ കടന്നു പോയി സീറ്റിലിരുന്നു. പിന്നീട് ടൊവിനോയുടെ ഇടപെടലിലൂടെ എല്ലാം സോള്‍വ് ആകുകയും ചെയ്തു. ഈ വീഡിയോ മന്ത്രി തന്നെ സോഷ്യല്‍ മീഡിയയില്‍ പങ്കുവയ്ക്കുകയും ചെയ്തിരുന്നു. 'ഞാനും പെട്ടു' എന്ന കുറിപ്പോടെയാണ് അദ്ദേഹം പോസ്റ്റിട്ടത്. ഇപ്പോഴിതാ ഇതിന് സാക്ഷാന്‍ ബേസില്‍ ജോസഫ് തന്നെ കമന്റ് രേഖപ്പെടുത്തിയിരിക്കുകയാണ്.
മന്ത്രിയുടെ പോസ്റ്റിന് താഴെ, 'വെല്‍ക്കം സര്‍ ! ഞങ്ങളുടെ മനയിലേക്ക് സ്വാഗതം' എന്നാണ് ബേസില്‍ ജോസഫ് കുറിച്ചത്. പിന്നാലെ എല്ലാത്തിനും സാക്ഷിയായ ടൊവിനോ തോമസും കമന്റുമായി എത്തി. 'പക്ഷെ തക്ക സമയത്ത് ഞാന്‍ ഇടപെട്ടതുകൊണ്ട് രക്ഷപ്പെട്ട്', എന്നാണ് ടൊവിനോ കുറിച്ചത്. ഈ കമന്റിപ്പോള്‍ സോഷ്യല്‍ മീഡിയയില്‍ ട്രെന്റിങ് ആയിട്ടുണ്ട്.
