തിരുവല്ല : ബസ്സിന്റെ സമയക്രമത്തെ ചൊല്ലി യാത്രക്കാരുമായി എത്തിയ സ്വകാര്യ ബസ് തടഞ്ഞു നിർത്തി ഡ്രൈവറുടെ കഴുത്തിൽ വടിവാൾ വെച്ച് ഗുണ്ടാ സംഘത്തിൻറെ ഭീഷണി . തിരുവല്ല - മല്ലപ്പള്ളി റൂട്ടിൽ ഓടുന്ന തിരുവമ്പാടി ബസ്സിലെ ഡ്രൈവർ മല്ലപ്പള്ളി ചെങ്ങരൂർ വടക്കേക്കര വീട്ടിൽ വിഷ്ണുവിന് നേരെയാണ് ആക്രമണം ഉണ്ടായത്. ഇന്ന് വൈകിട്ട് നാലുമണിയോടെ മല്ലപ്പള്ളി കടുവാക്കുഴി ജംഗ്ഷന് സമീപമായിരുന്നു സംഭവം.
മല്ലപ്പള്ളി ബസ് സ്റ്റാൻഡിൽ നിന്നും യാത്രക്കാരുമായി തിരുവല്ലയിലേക്ക് വരികയായിരുന്ന സ്ത്രീകൾ ഉൾപ്പെടെയുള്ള യാത്രക്കാർ അടങ്ങുന്ന ബസ് തടഞ്ഞുനിർത്തിയ അഞ്ചംഗ സംഘം ബസ്സിനുള്ളിൽ വടിവാളുമായി കയറി ഡ്രൈവറെ ഭീഷണിപ്പെടുത്തുകയായിരുന്നു. യാത്രക്കാരിൽ ഒരാൾ സംഭവം ദൃശ്യം മൊബൈലിൽ പകർത്തിയിരുന്നു.
സംഭവം സംബന്ധിച്ച് തിരുവല്ല - മലപ്പള്ളി റൂട്ടിൽ ഓടുന്ന ജാനകി ബസിൻ്റെ ഡ്രൈവർ ശ്രീകുമാറും കണ്ടാൽ അറിയാത്ത നാല് പേർക്കും എതിരെ വിഷ്ണു കീഴ്വായ്പൂർ പോലീസിലും തിരുവല്ല ഡിവൈഎസ്പിക്കും പരാതി നൽകിയിട്ടുണ്ട്.
