ഭിന്നതാ വിവാദം കത്തുന്നതിനിടെ ബിജെപിയുടെ സംസ്ഥാന കോര്‍ കമ്മിറ്റി ഇന്ന് തിരുവനന്തപുരത്ത് യോഗം ചേരും. സംസ്ഥാന ഭാരവാഹികളെ തീരുമാനിക്കലാണ് മുഖ്യ അജണ്ട. കഴിഞ്ഞ ദിവസം തൃശൂരില്‍ വച്ച് ചേര്‍ന്ന സംസ്ഥാന നേതൃയോഗത്തിലും കോര്‍ കമ്മിറ്റിയിലും മുന്‍ സംസ്ഥാന അധ്യക്ഷന്മാരായ വി മുരളീധരനെയും കെ സുരേന്ദ്രനെയും ഒഴിവാക്കിയതോടെയാണ് ഒരു ഇടവേളക്കുശേഷം സംസ്ഥാന ബിജെപിയില്‍ ആഭ്യന്തര കലഹം രൂക്ഷമായത്.
പുതിയ സംസ്ഥാന അധ്യക്ഷനെ പി കെ കൃഷ്ണദാസ് വിഭാഗം ഹൈജാക്ക് ചെയ്തു എന്നാണ് വി മുരളീധരന്‍ പക്ഷത്തിന്റെ ആരോപണം. രാജീവ് ചന്ദ്രശേഖര്‍ സംസ്ഥാന അധ്യക്ഷനായതിന് ശേഷം പി കെ കൃഷ്ണദാസ് എം ടി രമേശ് പക്ഷത്തിന് മുന്തിയ പരിഗണന നല്‍കുന്നുവെന്നും പരാതിയുണ്ട്. രാജീവ് ചന്ദ്രശേഖര്‍ ഏകപക്ഷീയമായി സംസ്ഥാന ഭാരവാഹികളെ തീരുമാനിച്ചാല്‍ അംഗീകരിക്കില്ലെന്ന നിലപാടിലാണ് വി മുരളീധരന്‍ പക്ഷം.
