തൃശ്ശൂർ: തൃശ്ശൂരിൽ ബസ്സിൽ നിന്ന് തെറിച്ചുവീണ് യാത്രിക മരിച്ചു. പൂവത്തൂർ സ്വദേശിനി നളിനിയാണ് (74 വയസ്) മരിച്ചത്. രാവിലെ പത്തേകാലോടെ പൂവത്തൂർ പൂച്ചക്കുന്ന് ഭാഗത്തുനിന്നും സ്വകാര്യ ബസ്സിൽ കയറിയ നളിനി, ഡ്രൈവർ സീറ്റിന് പുറകിൽ നിന്ന് ഒഴിഞ്ഞ സീറ്റിലേക്ക് മാറുന്നതിനിടെ ബാലൻസ് തെറ്റി മുൻവശത്തെ ഡോറിലൂടെ പുറത്തേക്ക് വീഴുകയായിരുന്നു.
ഡോർ അടച്ചിരുന്നെങ്കിലും യാത്രക്കാരി വീണപ്പോൾ തുറന്ന് പോവുകയായിരുന്നു. അപകടം നടന്നയുടൻ പറപ്പൂർ പ്രാഥമിക ആരോഗ്യ കേന്ദ്രത്തിൽ എത്തിച്ചെങ്കിലും ജീവൻ രക്ഷിക്കാനായില്ല.
