വാട്സ്ആപ്പ് അടുത്ത ഫീച്ചർ അപ്‌ഡേറ്റിന് ഒരുങ്ങുന്നു.ഇനി ഉപയോക്താക്കള്‍ക്ക് അവരുടെ ഫേസ്ബുക്ക് അല്ലെങ്കില്‍ ഇൻസ്റ്റഗ്രാം പ്രൊഫൈല്‍ ഫോട്ടോകള്‍ നേരിട്ട് വാട്‌സ്‌ആപ്പിലേക്ക് ഡിപിയായി ഇംപോർട്ട് ചെയ്യാം. ആൻഡ്രോയ്‌ഡിനുള്ള വാട്സ്ആപ്പ് ബീറ്റയില്‍ (പതിപ്പ് 2.25.21.23) പുതിയ ഫീച്ചർ പ്രത്യക്ഷപ്പെട്ടതായി റിപ്പോർട്ട് ചെയ്യുന്നു. ചില ബീറ്റാ ടെസ്റ്റർമാർക്ക് ഈ അപ്‌ഡേറ്റ് ലഭിച്ചുതുടങ്ങിയിട്ടുണ്ട്. വരും ആഴ്ചകളില്‍ കൂടുതല്‍ ഉപയോക്താക്കള്‍ക്കായി പുത്തന്‍ ഫീച്ചര്‍ പുറത്തിറക്കും എന്നാണ് റിപ്പോർട്ട്.
നിങ്ങളുടെ വാട്സ്ആപ്പ് പ്രൊഫൈല്‍ ഫോട്ടോ മാറ്റാൻ എഡിറ്റ് ഓപ്ഷനിലേക്ക് പോകുമ്ബോള്‍, ഇപ്പോള്‍ നിങ്ങള്‍ക്ക് ഇൻസ്റ്റഗ്രാമില്‍ നിന്നും ഫേസ്ബുക്കില്‍ നിന്നും ഫോട്ടോകള്‍ ഇംപോർട്ട് ചെയ്യാനുള്ള ഓപ്ഷനും വൈകാതെ ലഭിക്കും. ഇതുവരെ ഉപയോക്താക്കള്‍ക്ക് ഗാലറിയില്‍ നിന്ന് ഫോട്ടോകള്‍ തിരഞ്ഞെടുക്കാനോ, ക്യാമറയില്‍ നിന്ന് ക്ലിക്ക് ചെയ്യാനോ, അവതാർ ചേർക്കാനോ അല്ലെങ്കില്‍ എഐ ജനറേറ്റഡ് ഇമേജുകള്‍ ഉപയോഗിക്കാനോ മാത്രമേ കഴിയുമായിരുന്നുള്ളൂ. എന്നാല്‍ പുതിയ ഫീച്ചർ ഉപയോഗിച്ച്‌ വാട്സ്ആപ്പില് ഡിസ്പ്ലേ പിക്‌ചറായി ഇൻസ്റ്റഗ്രാം അല്ലെങ്കില്‍ ഫേസ്ബുക്ക് പ്രൊഫൈല്‍ ചിത്രം ഉപയോഗിക്കാനുള്ള ഓപ്ഷനും ഉടനടി എല്ലാ വാട്സ്ആപ്പ് ഉപയോക്താക്കള്‍ക്കും ലഭിക്കും.
ഈ ഫീച്ചർ ഉപയോഗിക്കുന്നതിന്, ആദ്യം മെറ്റ അക്കൗണ്ട്സ് സെന്‍ററിലെ നിങ്ങളുടെ വാട്സ്ആപ്പ് അക്കൗണ്ട് ഫേസ്ബുക്കുമായും ഇൻസ്റ്റാഗ്രാം അക്കൗണ്ടുമായും ലിങ്ക് ചെയ്യണം. ഈ വർഷം ആദ്യം മെറ്റ അക്കൗണ്ട്സ് സെന്‍ററിലേക്ക് വാട്‌സ്‌ആപ്പും ചേർക്കാനുള്ള മെറ്റ ഓപ്ഷൻ നല്‍കിയിരുന്നു. ഫേസ്ബുക്കിനും ഇൻസ്റ്റഗ്രാമിനും ഇടയില്‍ മികച്ച സംയോജനം കൊണ്ടുവരുന്ന നിരവധി സവിശേഷതകള്‍ മെറ്റാ ഇതിനകം അവതരിപ്പിച്ചിട്ടുണ്ട്. ഉദാഹരണത്തിന്, നിങ്ങള്‍ക്ക് ഇപ്പോള്‍ ഇൻസ്റ്റഗ്രാം സ്റ്റാറ്റസ് നേരിട്ട് വാട്‌സ്‌ആപ്പിലേക്ക് പങ്കിടാം. കൂടാതെ ബിസിനസ് അക്കൗണ്ടുകള്‍ക്ക് അവരുടെ ഇൻസ്റ്റാ പ്രൊഫൈലിലേക്ക് ഒരു വാട്സ്ആപ്പ് ബട്ടണ്‍ ചേർക്കാനും കഴിയും. അതുവഴി ഉപഭോക്താക്കള്‍ക്ക് അവരെ നേരിട്ട് വാട്സ്ആപ്പില് ബന്ധപ്പെടാൻ കഴിയും.
