തിരുവനന്തപുരം കോര്‍പ്പറേഷന്‍ തെരഞ്ഞെടുപ്പില്‍ കെഎസ്.യു വനിതാ നേതാവിനെ രംഗത്തിറക്കി കോണ്‍ഗ്രസ്. കഴിഞ്ഞ തവണ എസ്എഫ്‌ഐ നേതാവായ ആര്യാ രാജേന്ദ്രനെ സിപിഎം രംഗത്തിറക്കിയതിന് സമാനമായാണ് കെഎസ്യു ജില്ലാ വൈസ് പ്രസിഡന്റും 24കാരിയുമായ വൈഷ്ണ സുരേഷിനെ രംഗത്തിറക്കുന്നത്. സിപിഎമ്മിന്റെ സിറ്റിങ് സീറ്റായ മുട്ടട വാര്‍ഡിലാകും വൈഷ്ണ മത്സരിക്കുക. നിലവില്‍ ടെക്‌നോപാര്‍ക്ക് ജീവനക്കാരിയായ വൈഷ്ണ പേരൂര്‍ക്കട ലോ കോളജിലെ നിയമ വിദ്യാര്‍ഥിനി കൂടിയാണ്. തിരുവനന്തപുരം പ്രസ് ക്ലബില്‍നിന്ന് ജേണലിസത്തില്‍ ഡിപ്ലോമ നേടിയ ശേഷം ടിവി ചാനലുകളിലും ഷോകളിലും അവതാരകയായും ജോലി ചെയ്തിട്ടുണ്ട്.
തിരുവനന്തപുരം ഗവ.വനിതാ കോളജിലെ കെഎസ്യു യൂണിറ്റ് പ്രസിഡന്റായിരുന്ന വൈഷ്ണ യൂണിയന്‍ തിരഞ്ഞെടുപ്പില്‍ ചെയര്‍പഴ്‌സന്‍ സ്ഥാനാര്‍ഥിയായി മത്സരിച്ചിരുന്നു. കെഎസ്യു വട്ടിയൂര്‍ക്കാവ് നിയോജക മണ്ഡലം വൈസ് പ്രസിഡന്റായിരുന്നു. ബാസ്‌കറ്റ്‌ബോളില്‍ കഴിവു തെളിയിച്ച വൈഷ്ണ കര്‍ണാടക സംഗീതജ്ഞയുമാണ്. സുരേഷ് കുമാര്‍, ലെളി സുരേഷ് എന്നിവരാണ് മാതാപിതാക്കള്‍. ഇന്ന് സ്ഥാനാര്‍ഥികളെ ഔദ്യോഗികമായി പ്രഖ്യാപിക്കുന്നതോടെ വാര്‍ഡുകളില്‍ സജീവമാകാനാണ് വൈഷ്ണ ഉള്‍പ്പെടെയുള്ള സ്ഥാനാര്‍ഥികളുടെ തീരുമാനം.
