സായ് പല്ലവി നായികയായ ‘ഏക് ദിൻ’ നവംബർ 7ന് തിയേറ്ററുകളിൽ റിലീസ് ചെയ്യും. ആമിർ ഖാൻ പ്രൊഡക്ഷൻസിന്റെ ബാനറിലാണ് ചിത്രം ഒരുങ്ങുന്നത്. 17 വർഷത്തിന് ശേഷം ആമിർ ഖാനും മൻസൂർ ഖാനും നിർമ്മാതാക്കളായി വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്.
ജുനൈദ് ഖാനും സായ് പല്ലവിയും ആദ്യമായി ഒന്നിക്കുന്ന ചിത്രം കൂടിയാണിത്. സുനിൽ പാണ്ഡെ സംവിധാനം ചെയ്യുന്ന ‘ഏക് ദിൻ’ ജുനൈദ് ഖാന്റെ മൂന്നാമത്തെ ചിത്രവും സായ് പല്ലവിയുടെ ബോളിവുഡ് അരങ്ങേറ്റവുമാണ്. ‘മഹാരാജ്’, ‘ലവ്‌യാപ’ എന്നീ ചിത്രങ്ങളിലൂടെ ശ്രദ്ധേയനായ ജുനൈദ് ഈ ചിത്രത്തിൽ ഒരു ജേർണലിസ്റ്റിന്റെ വേഷത്തിൽ എത്തുന്നതായി റിപ്പോർട്ടുകൾ സൂചിപ്പിക്കുന്നു.
ആരാധകരുടെ പ്രിയപ്പെട്ട താരമായ സായ് പല്ലവി, ഈ ചിത്രത്തിലൂടെ ഹിന്ദി സിനിമയിൽ തന്റെ കഴിവ് തെളിയിക്കാൻ ഒരുങ്ങുകയാണ്. 2008ൽ പുറത്തിറങ്ങിയ ‘ജാനേ തു… യാ ജാനേ നാ’ എന്ന സൂപ്പർഹിറ്റ് ചിത്രത്തിന് ശേഷം ആമിർ ഖാനും മൻസൂർ ഖാനും ഒന്നിക്കുന്ന ഈ ചിത്രം ആരാധകർക്കിടയിൽ വലിയ പ്രതീക്ഷകൾ ഉണർത്തിയിട്ടുണ്ട്.