സുരാജ് വെഞ്ഞാറമൂട് നായകനായി എത്തിയ ചിത്രമാണ് എക്ട്രാ ഡീസന്റ് (ഇഡി). ഒരു ചിരി ചിത്രമായിട്ടാണ് എക്സ്ട്രാ ഡീസന്റ് തിയറ്ററുകളിൽ എത്തിയത്. ആമിർ പള്ളിക്കലാണ് ചിത്രത്തിൻ്റെ സംവിധാനം നിർവ്വഹിച്ചിരിക്കുന്നത്. പ്രമുഖ നിർമ്മാതാവായ ലിസ്റ്റിൻ സ്റ്റീഫന്റെ മാജിക് ഫ്രെയിംസും സുരാജ് വെഞ്ഞാറമൂടിന്റെ വിലാസിനി സിനിമാസും ചേർന്നാണ് ചിത്രം നിർമ്മിച്ചിരിക്കുന്നത്. ഇപ്പോഴിതാ ചിത്രം ഒടിടിയിലേക്ക് എത്തുകയാണ്.
ചിത്രം മനോരമ മാക്സിലൂടെ ഏപ്രിൽ 26നാണ് ഒടിടിയിൽ എത്തുന്നത്. സുരാജ് വെഞ്ഞാറമൂട്, ഗ്രേസ്‌ ആന്റണി, പ്രേമലു ഫെയിം ശ്യാം മോഹൻ എന്നിവരുടെ ഫൺ കോമ്പോയാണ്‌ സിനിമയുടെ ഹൈലൈറ്റ്‌ എന്നാണ് അഭിപ്രായം. ഡാർക്ക് ഹ്യൂമർ വിഭാഗത്തിൽ പെടുന്ന ചിത്രമാണിത്. ചിത്രത്തിന്റെ രചന നിർവ്വഹിച്ചിരിക്കുന്നത് ആഷിഫ് കക്കോടി ആണ്. അങ്കിത് മേനോൻ ആണ് ഇ ഡിയിലെ ഹിറ്റ് ചാർട്ടിൽ ഇടം നേടിയ ഗാനങ്ങൾ ഒരുക്കിയിരിക്കുന്നത്.
അതേസമയം ഒട്ടനവധി പ്രത്യേകതകളുള്ള ഒരു കഥാപാത്രത്തെയാണ് സുരാജ് ചിത്രത്തിൽ അവതരിപ്പിച്ചിരിക്കുന്നത്. വിനയ പ്രസാദ്‌, റാഫി, സുധീർ കരമന, ദിൽന പ്രശാന്ത് അലക്‌സാണ്ടർ, ഷാജു ശ്രീധർ, സജിൻ ചെറുകയിൽ, വിനീത് തട്ടിൽ എന്നിങ്ങനെ ചിത്രത്തിലെ മറ്റു താരങ്ങളും ഗംഭീര പ്രകടനമാണ് ചിത്രത്തിൽ കാഴ്ച വെച്ചിരിക്കുന്നത്. കഴിഞ്ഞ വർഷത്തെ ക്രിസ്‍മസ് റിലീസ് ആയി ഡിസംബർ 20 ന് തിയറ്ററുകളിൽ എത്തിയ ചിത്രമായിരുന്നു ഇത്.