ഐഫോൺ വിൽപന വർധിച്ചതോടെ ഇന്ത്യയിൽ കൂടുതൽ ആപ്പിൾ സ്റ്റോറുകൾ തുറക്കാൻ ഒരുങ്ങുകയാണ് കമ്പനി. 2025-ൻറെ അവസാനത്തോടെ ഇന്ത്യയിൽ പുതിയ ആപ്പിൾ സ്റ്റോറുകൾ തുറക്കുമെന്ന് സിഇഒ ടിം കുക്ക് വെളിപ്പെടുത്തി. മുംബൈയിലെ ബികെസി സ്റ്റോറും ഡൽഹിയിലെ സാകേത് സ്റ്റോറും വൻ വിജയമായിരുന്നു. എവിടെയൊക്കെയാണ് പുതിയ ആപ്പിൾ റിടെയ്‌ൽ സ്റ്റോറുകൾ വരുന്നതെന്ന് അറിഞ്ഞിരിക്കാം.
അതേസമയം ഇന്ത്യയിൽ വരാനിരിക്കുന്ന ആപ്പിൾ സ്റ്റോറുകളുടെ ലൊക്കേഷനുകൾ ആപ്പിൾ സ്ഥിരീകരിച്ചിട്ടില്ല. എങ്കിലും ചില സ്ഥലങ്ങൾ അഭ്യൂഹങ്ങളിൽ നിറയുന്നുണ്ട്. മുംബൈയിലെ സ്കൈ സിറ്റി മാൾ, ബെംഗളൂരുവിലെ ഫീനിക്സ് മാൾ ഓഫ് ഏഷ്യ, പൂനെയിലെ കോപ മാൾ, നോയിഡയിലെ ഡിഎൽഎഫ് മാൾ എന്നിവയാണ് പുതിയ ആപ്പിൾ സ്റ്റോറുകളുടെ ലൊക്കേഷനുകളായി പറയപ്പെടുന്നത്.
ദക്ഷിണേന്ത്യയിൽ മറ്റെവിടെയെങ്കിലും പുതിയ ആപ്പിൾ സ്റ്റോർ വരുമോയെന്ന് വ്യക്തമല്ല. ഇന്ത്യയിൽ ഐഫോണുകൾക്ക് വലിയ വിൽപനയാണ് ഇപ്പോൾ ദൃശ്യമാകുന്നത്. ഫിസിക്കൽ സ്റ്റോറുകൾ ആപ്പിളിൻറെ ഐഫോണുകൾ, ഐപാഡുകൾ, മാക്കുകൾ, ആപ്പിൾ വാച്ചുകൾ എല്ലാം പ്രദർശിപ്പിക്കുന്ന ഇടമാകും. ഇന്ത്യക്ക് പുറമെ ഗൾഫ് രാജ്യങ്ങളിലും കൂടുതൽ സ്റ്റോറുകൾക്ക് ആപ്പിൾ ശ്രമിക്കുന്നതായാണ് റിപ്പോർട്ട്.
