ഇന്ത്യ-കാനഡ ബന്ധം പൂര്‍വ്വസ്ഥിതിയിലാകുന്നതിന്റെ സൂചന നല്‍കി, ഇന്ത്യ കാനഡയിലെ പുതിയ സ്ഥാനപതിയെ നിയമിച്ചു. ഒമ്പത് മാസത്തെ ഇടവേളക്ക് ശേഷം 1990 ബാച്ചിലെ ഇന്ത്യന്‍ ഫോറിന്‍ സര്‍വീസ് (ഐ.എഫ്.എസ്) ഉദ്യോഗസ്ഥനായ ദിനേഷ് കെ. പട്‌നായികിനെയാണ് ഇന്ത്യയുടെ ഹൈക്കമ്മീഷണറായി നിയമിച്ചത്. നിലവില്‍ സ്‌പെയിനിലെ ഇന്ത്യന്‍ അംബാസഡറായി സേവനമനുഷ്ഠിക്കുന്ന അദ്ദേഹം ഉടന്‍ ചുമതലയേല്‍ക്കും.
കനേഡിയന്‍ പ്രധാനമന്ത്രിയായിരുന്ന ജസ്റ്റിന്‍ ട്രൂഡോയുടെ പ്രസ്താവനയെത്തുടര്‍ന്ന് 2023 സെപ്റ്റംബറിലാണ് ഇന്ത്യയും കാനഡയും തമ്മിലുള്ള നയതന്ത്ര ബന്ധം വഷളായത്. ഖലിസ്ഥാന്‍ തീവ്രവാദി ഹര്‍ദീപ് സിങ് നിജ്ജറിന്റെ കൊലപാതകത്തില്‍ ഇന്ത്യക്ക് പങ്കുണ്ടെന്ന ട്രൂഡോയുടെ ആരോപണം ഇരു രാജ്യങ്ങളും തമ്മില്‍ ഗുരുതരമായ നയതന്ത്ര സംഘര്‍ഷങ്ങള്‍ക്ക് വഴിവെച്ചിരുന്നു. തുടര്‍ന്ന് 2024 ഒക്ടോബറില്‍ കാനഡയിലെ തങ്ങളുടെ സ്ഥാനപതിയെ ഇന്ത്യ പിന്‍വലിച്ചു.
കാനഡയില്‍ മാര്‍ക് കാര്‍ണി പുതിയ പ്രധാനമന്ത്രിയായി അധികാരത്തിലെത്തിയതോടെ ഇന്ത്യ-കാനഡ ബന്ധം സാധാരണ നിലയിലാകുമെന്ന പ്രതീക്ഷകള്‍ ഉടലെടുത്തിരുന്നു. ഇതിന് ശക്തി പകരുന്നതാണ് ഇന്ത്യയുടെ പുതിയ തീരുമാനമെന്നാണ് വിലയിരുത്തല്‍. ദിനേഷ് കെ. പട്‌നായികിന്റെ നിയമനം ഇരു രാജ്യങ്ങളും തമ്മിലുള്ള ബന്ധം കൂടുതല്‍ ദൃഢമാക്കുന്നതിനുള്ള നിര്‍ണ്ണായകമായൊരു ചുവടുവെപ്പായി കണക്കാക്കപ്പെടുന്നു.
