പെൺകുട്ടികളുടെ അവകാശങ്ങൾക്കായി പോരാടിയ 17 കാരിയായ നില ഇബ്രാഹിമി, അന്താരാഷ്ട്ര ബാലവകാശ സമാധാന പുരസ്കാരത്തിന് അർഹയായി. ചൊവ്വാഴ്ച അംസ്റ്റർഡാമിൽ നടന്ന ചടങ്ങിൽ അവരെ ആദരിച്ചു. മലാല യൂസഫ്സായ്, ഗ്രെറ്റ തൺബർഗ്, എൻകോസി ജോൺസൺ എന്നിവർക്കു മുമ്പ് ലഭിച്ച പുരസ്കാരമാണ് ഈ തവണ നിലയ്ക്ക് ലഭിച്ചത്.
അഫ്ഗാനിസ്ഥാനിലെ പെൺകുട്ടികളുടെ വിദ്യാഭ്യാസവും അവകാശങ്ങളും സംരക്ഷിക്കുന്നതിനായി നടത്തിവന്ന ധീരമായ പ്രവർത്തനങ്ങൾക്ക് ആദരമായാണ് പുരസ്കാരം ലഭിച്ചത്. 2021 മാർച്ചിൽ, അഫ്ഗാനിലെ കാബൂൾ വിദ്യാഭ്യാസ വകുപ്പ് 12 വയസ്സിന് മുകളിലുള്ള പെൺകുട്ടികൾ പൊതുവേദിയിൽ പാടുന്നത് നിരോധിക്കുകയായിരുന്നു. ഈ ഉത്തരവിനെതിരെ നില ശക്തമായ പ്രതിഷേധം നടത്തി.
#IAmMySong എന്ന പ്രചാരണത്തിന്റെ ഭാഗമായി അവൾ ഒരു പ്രതിഷേധഗാനം റെക്കോർഡ് ചെയ്തു. വീഡിയോ വൈറലായതോടെ ആ ഉത്തരവ് കുറച്ചുകാലത്തിനുള്ളിൽ പിന്‍വലിക്കപ്പെട്ടു. 2021-ൽ താലിബാൻ അധികാരം പിടിച്ചെടുത്തതിന് ശേഷം നിലയും കുടുംബവും 30 ബേർഡ്സ് ഫൗണ്ടേഷൻ എന്ന സംഘടനയുടെ സഹായത്തോടെ അഫ്ഗാനിസ്ഥാനിൽ നിന്ന് രക്ഷപ്പെട്ടു.
അവർ പാകിസ്ഥാനിലേക്ക് സ്ഥലം മാറി, പിന്നീട് കാനഡയിലേക്ക് കുടിയേറി. ഇപ്പോഴും നില അഫ്ഗാനിലെ പെൺകുട്ടികളുടെ അവകാശങ്ങൾക്കായി ശബ്ദമുയർത്തുകയാണ്. “ലോകത്തിന്റെ ഒരു ഭാഗത്ത് സ്ത്രീകളുടെ അവകാശങ്ങൾ തകരുമ്പോൾ, അതിന്റെ ആഘാതം ലോകമെമ്പാടും അനുഭവപ്പെടും,” എന്ന് നില പറഞ്ഞു.