കൊയിലാണ്ടി: കൊയിലാണ്ടിയിൽ ഒൻപതുവയസ്സുകാരനെ ലൈംഗികമായി ഉപദ്രവിച്ച സംഭവത്തിൽ പ്രതിയ്ക്ക് അഞ്ചുവർഷം കഠിനതടവും പതിനേഴായിരം രൂപ പിഴയും ശിക്ഷ വിധിച്ചു. പുതുപ്പാടി എലോക്കര കുന്നുമ്മൽവീട്ടിൽ മുസ്തഫ(52)യെയാണ് കൊയിലാണ്ടി ഫാസ്റ്റ്ട്രാക്ക് സ്‌പെഷ്യൽ കോടതി ജഡ്ജി നൗഷാദലി കെ. പോക്‌സോ നിയമപ്രകാരവും ഇന്ത്യൻ ശിക്ഷാനിയമപ്രകാരവും ശിക്ഷിച്ചത്.
2018-ലാണ് കേസിനാസ്പദമായ സംഭവം നടന്നത്. കുട്ടിയെ മറ്റാരുമില്ലാത്തസമയത്ത് പ്രതിയുടെ വീട്ടിലേക്ക് കൂട്ടിക്കൊണ്ടുപോയി ലൈംഗികമായി ഉപദ്രവിച്ചെന്നാണ് കേസ്. പിന്നീട് സ്‌കൂളിൽ പോക്‌സോനിയമത്തെ സംബന്ധിച്ച് ക്ലാസ് കേട്ടതിനുശേഷം കുട്ടി രക്ഷിതാക്കളോട് കാര്യം പറയുകയും തുടർന്ന് പോലീസിനെ അറിയിക്കുകയുമായിരുന്നു.
