സംസ്ഥാന സ്‌കൂള്‍ കലോത്സവത്തിന് സൗജന്യ യാത്രാ സൗകര്യം ഒരുക്കി കെഎസ്ആര്‍ടിസി. പത്ത് ഇലക്ട്രിക്ക് ബസുകളാണ് കലോത്സവത്തിനായി സര്‍വീസ് നടത്താന്‍ കെഎസ്ആര്‍ടിസി ഒരുക്കിയിരിക്കുന്നത്. വിവിധ വേദികളെ ബന്ധിപ്പിച്ച് രാവിലെ 8 മുതല്‍ രാത്രി 9 വരെയാണ് ബസ് സര്‍വീസ് നടത്തുക. വേദികളില്‍ നിന്നും പുത്തരിക്കണ്ടം മൈതാനത്തെ ഭക്ഷണ കേന്ദ്രത്തിലേക്കാണ് പ്രധാനമായും ബസ് സര്‍വീസ് നടത്തുക.
മുന്‍ വര്‍ഷങ്ങളില്‍ വിദ്യാര്‍ത്ഥികള്‍ക്കും അധ്യാപകര്‍ക്കും മാത്രമാണ് ബസ് സര്‍വീസുകള്‍ നല്‍കിയിരുന്നത്. എന്നാല്‍ ഈ കലോത്സവത്തിന് കുട്ടികള്‍ക്ക് മാത്രമല്ല അവരുടെ അധ്യാപകര്‍ക്കും പരിശീലകര്‍ക്കും കാണികള്‍ക്കും സൗജന്യ യാത്രാ സൗകര്യമാണ് കെഎസ്ആര്‍ടിസി ഒരുക്കിയിരിക്കുന്നതെന്ന് ട്രാന്‍സ്പോര്‍ട്ടേഷന്‍ കമ്മിറ്റിയുടെ കണ്‍വീനറായ ഡോ റോയ് ബി ജോണ്‍ പറഞ്ഞു.
