ടെല്‍ അവീവ്: ഇസ്രായേല്‍-ഇറാന്‍ സംഘര്‍ഷം രൂക്ഷമായി തുടരുന്ന സാഹചര്യത്തില്‍, ഇസ്രായേലിലെ സുരക്ഷാ ബങ്കറുകളില്‍ തദ്ദേശീയര്‍ക്ക് മുന്‍ഗണന നല്‍കുന്നതായും വിദേശ തൊഴിലാളികള്‍ക്ക് പ്രവേശനം നിഷേധിക്കപ്പെടുന്നതായും ആരോപണം ഉയര്‍ന്നു. സോഷ്യല്‍ മീഡിയ പ്ലാറ്റ്‌ഫോമായ എക്‌സില്‍ പ്രചരിക്കുന്ന ഒരു പോസ്റ്റില്‍, തായ്ലന്‍ഡ്, ഫിലിപ്പീന്‍സ്, ഇന്ത്യ തുടങ്ങിയ രാജ്യങ്ങളില്‍ നിന്നുള്ള വിദേശ തൊഴിലാളികള്‍ക്ക് ബങ്കറുകളില്‍ പ്രവേശിക്കാന്‍ അനുവാദം നിഷേധിക്കപ്പെടുന്നതായി വ്യക്തമാക്കുന്നു.
ഇസ്രായേലില്‍, പ്രത്യേകിച്ച് ടെല്‍ അവീവ്, ഹൈഫ, പെറ്റാ ടിക്വ തുടങ്ങിയ നഗരങ്ങളില്‍, ഇറാന്റെ മിസൈല്‍ ആക്രമണങ്ങള്‍ ഭീതി പടര്‍ത്തിയിരിക്കുകയാണ്. അതിനിടെയാണ് സുരക്ഷാ ബങ്കറുകള്‍ തദ്ദേശീയ ഇസ്രായേലികള്‍ കൈയ്യടക്കുന്നതായുള്ള ആക്ഷേപം.
ഇസ്രായേലില്‍ ഏകദേശം 1.5 ലക്ഷത്തോളം വിദേശ തൊഴിലാളികള്‍ ഉണ്ടെന്നാണ് കണക്ക്. ഇവരില്‍ ഭൂരിഭാഗവും തായ്ലന്‍ഡ്, ഫിലിപ്പീന്‍സ്, ഇന്ത്യ, ചൈന എന്നിവിടങ്ങളില്‍ നിന്നുള്ളവരാണ്. സംഘര്‍ഷ സമയത്ത് ഇവര്‍ക്ക് സുരക്ഷിതമായ താമസസ്ഥലങ്ങളോ ബങ്കറുകളിലേക്കുള്ള പ്രവേശനമോ ലഭിക്കുന്നില്ലെന്നാണ് ആരോപണം. 'മിസൈലുകള്‍ വരുമ്പോള്‍ ഞങ്ങള്‍ക്ക് ഓടി ഒളിക്കാന്‍ പോലും സ്ഥലമില്ല,' ഒരു തായ് തൊഴിലാളി പ്രാദേശിക മാധ്യമത്തോട് പറഞ്ഞതായി റിപ്പോര്‍ട്ടുകള്‍ സൂചിപ്പിക്കുന്നു.
ഇസ്രായേലില്‍ ഏകദേശം 25,000 ഇന്ത്യക്കാര്‍ താമസിക്കുന്നുണ്ടെന്നാണ് വിവരം. തൊഴിലാളികളും വിദ്യാര്‍ത്ഥികളുമാണ് ഭൂരിഭാഗവും. ഇന്ത്യന്‍ എംബസി, ഇസ്രായേലിലെ ഇന്ത്യക്കാര്‍ക്ക് ജാഗ്രത പാലിക്കാനും അധികൃതര്‍ നല്‍കുന്ന സുരക്ഷാ നിര്‍ദേശങ്ങള്‍ പാലിക്കാനും ആവശ്യപ്പെട്ടിട്ടുണ്ട്.
ഈ ആരോപണങ്ങളോട് ഇസ്രായേല്‍ അധികൃതര്‍ ഔദ്യോഗികമായി പ്രതികരിച്ചിട്ടില്ല. എന്നാല്‍, സുരക്ഷാ ബങ്കറുകളുടെ ലഭ്യത പരിമിതമാണെന്നും, തദ്ദേശീയ പൗരന്മാര്‍ക്ക് മുന്‍ഗണന നല്‍കുന്നത് സുരക്ഷാ പ്രോട്ടോക്കോളിന്റെ ഭാഗമാണെന്നും ചില റിപ്പോര്‍ട്ടുകള്‍ സൂചിപ്പിക്കുന്നു.
സംഘര്‍ഷം രൂക്ഷമായതിനാല്‍, ഇന്ത്യ ഇസ്രായേലിലും ഇറാനിലും കുടുങ്ങിയ തങ്ങളുടെ പൗരന്മാരെ ഒഴിപ്പിക്കാനുള്ള നടപടികള്‍ ആരംഭിച്ചിട്ടുണ്ട്. ഇറാനില്‍ നിന്ന് 200 ഇന്ത്യന്‍ വിദ്യാര്‍ത്ഥികള്‍ അര്‍മേനിയ അതിര്‍ത്തി വഴി രക്ഷപ്പെട്ടതായും, ഇസ്രായേലില്‍ നിന്ന് 25,000 ഇന്ത്യക്കാരെ ഒഴിപ്പിക്കാന്‍ പദ്ധതിയിടുന്നതായും റിപ്പോര്‍ട്ടുകള്‍ വ്യക്തമാക്കുന്നു.