കേന്ദ്ര സര്‍ക്കാരിന്റെ വിദ്യാഭ്യാസ പദ്ധതിയായ പി എം ശ്രീ, കേരളവും അംഗീകരിച്ചതില്‍ ഇടത് മുന്നണിയിലെ പരസ്യ പൊട്ടിത്തെറിക്ക് പിന്നാലെ ഇടത് വിദ്യാര്‍ഥി-യുവജന സംഘടനകള്‍ തെരുവില്‍ പ്രതിഷേധം കനപ്പിക്കുന്നു. പിണറായി സര്‍ക്കാരിന്റെ നടപടിക്കെതിരെ പരസ്യ പ്രതിഷേധത്തിന് എ ഐ വൈ എഫും എ ഐ എസ് എഫും തീരുമാനിച്ചു. ഇതിന്റെ ഭാഗമായി ഇന്ന് തലസ്ഥാനത്ത് സി പി ഐയുടെ യുവജന - വിദ്യാര്‍ഥി സംഘടനകള്‍ പ്രതിഷേധമുയര്‍ത്തും. തിങ്കളാഴ്ച ജില്ലകളില്‍ പ്രതിഷേധം നടത്തുമെന്നും ഭാരവാഹികള്‍ അറിയിച്ചു.
പി എം ശ്രീ പദ്ധതിയില്‍ നിന്ന് പിന്‍മാറുന്നത് വരെ പ്രതിഷേധം തുടരുമെന്നും എ ഐ വൈ എഫ് - എ ഐ എസ് എഫ് ഭാരവാഹികള്‍ വ്യക്തമാക്കി. അതിനിടെ കണ്ണൂരില്‍ എ ഐ വൈ എഫ്, മന്ത്രി വി ശിവന്‍കുട്ടിയുടെ കോലം കത്തിച്ചു. ബി ജെ പിയുടെ വര്‍ഗിയ അജണ്ടക്ക് സി പി എം കൂട്ടുനില്‍ക്കുന്നുവെന്ന മുദ്രാവാക്യം മുഴക്കിയായിരുന്നു പ്രതിഷേധം. തീരുമാനവുമായി സര്‍ക്കാര്‍ മുന്നോട്ട് പോകുകയാണെങ്കില്‍ മന്ത്രിമാരെ സി പി ഐ പിന്‍വലിക്കണമെന്ന് എ ഐ വൈ എഫ് ജില്ലാ സെക്രട്ടറി കെ വി സാഗര്‍ ആവശ്യപ്പെട്ടു.
