മമ്മൂക്കയുമായി പുതിയ സിനിമ കമ്മിറ്റ് ചെയ്തുവെന്ന് വാര്‍ത്തയില്‍ മറുപടിയുമായി ജീത്തു ജോസഫ്. അങ്ങനെയൊരു സംഭവം താന്‍ അറിഞ്ഞിട്ടില്ലെന്നും ഇതുവരെ ഒരു ഡിസ്‌കഷനും അത് സംബന്ധിച്ച് നടന്നിട്ടില്ലെന്നാണ് ജീത്തു പറഞ്ഞത്. തന്റെ പുതിയ ചിത്രത്തിന്റെ പ്രസ്സ് മീറ്റിനിടെയാണ് ഇക്കാര്യം ജീത്തു ജോസഫ് പറഞ്ഞത്.
'ഞാന്‍ അങ്ങനൊരു സംഭവം അറിഞ്ഞിട്ടില്ല, ഒരു ഡിസ്‌കഷനും ഉണ്ടായിട്ടില്ല. ഒരു ഓണ്‍ലൈന്‍ മാധ്യമത്തില്‍ വന്ന വാര്‍ത്തയാണിത്, അതുപോലെ ദൃശ്യം മൂന്നാം ഭാഗം ഞാന്‍ എഴുതുന്നതിന് മുന്‍പ് എന്നെ ബോളിവുഡില്‍ നിന്ന് അവര്‍ ബന്ധപ്പെട്ടു. അങ്ങനെയിരിക്കെയാണ് എനിക്ക് ഒരു ഐഡിയ കിട്ടിയത് അവരോട് പറഞ്ഞപ്പോള്‍ ഒന്നിച്ച് റിലീസ് ചെയ്യാമോ എന്നൊരു ആവശ്യമാണ് അവര്‍ പങ്കുവെച്ചത്. ഇപ്പോള്‍ ഒരു മലയാള സിനിമ ഇറങ്ങിയാല്‍ പാന്‍ ഇന്ത്യന്‍ സ്വീകാര്യതയുണ്ട്. ഈ ഡിസ്‌കഷന്‍ ഇപ്പോഴും നടക്കുന്നുണ്ട്, ഞാന്‍ സ്‌ക്രിപ്റ്റ് മുഴുവന്‍ എഴുതിയെങ്കിലും അവര്‍ക്ക് അവിടെ കള്‍ച്ചറല്‍ മാറ്റങ്ങള്‍ ഉണ്ടാകും. അവര്‍ അതിന്റെ പണിപ്പുരയിലാണ്, ദൃശ്യ 3യുടെ കാര്യത്തില്‍ ഇതാണ് നിജസ്ഥിതി', ജീത്തു ജോസഫ് പറഞ്ഞു.
അതേസമയം, ആസിഫ് അലിയെ നായകനാക്കി ജീത്തു ജോസഫ് സംവിധാനം ചെയ്യുന്ന ഏറ്റവും പുതിയ ചിത്രമാണ് മിറാഷ്. അപര്‍ണ ബാലമുരളിയും സിനിമയില്‍ പ്രധാന വേഷത്തിലെത്തുന്നുണ്ട്. സെപ്റ്റംബര്‍ 19ന് സിനിമ തിയേറ്ററുകളിലെത്തും