ചിക്കനും ബീഫുമൊക്കെ കേടാകാതെ ഇരിക്കാൻ ഫ്രീസറിൽ സൂക്ഷിക്കുന്നത് പതിവാണ്. ഫ്രീസറിൽ സൂക്ഷിക്കുമ്പോൾ അതിൽ ഐസ് കട്ട പിടിച്ച് ഇരിക്കും. ഈ ഐസ് കളയാൻ ആയി സാധാരണ സ്വീകരിക്കുന്ന വഴി കുറച്ചു സമയം പുറത്തെടുത്ത് വെയ്ക്കുക എന്നതാണ്. എന്നാൽ ഇത് അത്ര നല്ല പ്രവണതയല്ല.
ലോകാരോഗ്യ സംഘടനയും യുഎസ് ഫുഡ് ആന്റ് ഡ്രഗ് അഡ്മിനിസ്ട്രേഷനുമുൾപ്പടെ ഇങ്ങനെ മാംസത്തിൽ നിന്ന് ഐസ് കളയുന്ന രീതി ആരോഗ്യം പ്രശ്നങ്ങൾക്കിടയാക്കുമെന്ന് ചൂണ്ടിക്കാട്ടുന്നു. ഏകദേശം 4.4 ഡിഗ്രി സെൽഷ്യസിന് മുകളിലേക്ക് ആഹാരത്തിന്റെ താപനില എത്തിയാൽ രണ്ട് മണിക്കൂറിൽ കൂടുതൽ ആ ഭക്ഷണം പുറത്തുവെയ്ക്കുകയാണെങ്കിൽ അതിൽ ബാക്ടീരിയകൾ വളരെ വേഗം വളരാൻ സാധ്യതയുണ്ടെന്നാണ് പറുയന്നത്.
സാൽമൊണല്ല, ഇ-കോളി, ലിസ്റ്റീരിയ മോണോസൈറ്റോജെൻസ് തുടങ്ങിയ ആരോഗ്യത്തിന് ഹാനികരമായ ബാക്ടീരയകൾ 20 മിനിറ്റിനുള്ളിൽ തന്നെ ഇരട്ടിയാകാൻ ശേഷിയുള്ളവയാണ്. ഇത്തരത്തിലുള്ള ബാക്ടീരിയകൾ ശരീരത്തിനുള്ളിലെത്തിയാൽ അവ പ്രതിരോധശേഷി കുറയ്ക്കാനും ഭക്ഷ്യവിഷബാധയിലേക്ക് നയിക്കാനും കാരണമാകുന്നു
.
ഇറച്ചിയിലെ ഐസ് കളയുന്നതിന് ശരിയായ രീതികൾ ഏതൊക്കെ
ഫ്രീസറിൽ വെച്ചിരിക്കുന്ന ഇറച്ചി അവിടുന്ന് എടുത്ത് ഫ്രിജിന്റെ താഴെത്തട്ടിൽ വെയ്ക്കുക. വലുപ്പമനുസരിച്ച് മണിക്കൂറുകൾ മുതൽ ഒരു ദിവസം വരെ ഐസ് പോകാൻ സമയമെടുക്കും പക്ഷെ താപനില 4.4 ഡിഗ്രി സെൽഷ്യസിനു താഴെയായതിനാൽ സുരക്ഷിതമായ രീതിയാണ്.
ഇറച്ചി ഒരു ബാഗിലാക്കി തണുത്ത വെള്ളത്തിൽ വെയ്ക്കുക. ഓരോ 30 മിനിറ്റിലും വെള്ളം മാറ്റണം.
ഡിഫ്രോസ്റ്റ് എന്ന മൈക്രോവേവിലെ ഓപ്ഷൻ ഉപയോഗിക്കുക.
