റീൽസ് വീഡിയോകൾ സൗജന്യമായി എഡിറ്റ് ചെയ്യാൻ സാധിക്കുന്ന പുതിയ ആപ്പ് പുറത്തിറക്കി മെറ്റ. ടിക് ടോക്കിന്റെ കാപ്പ്കട്ട് ആപ്പിന് സമാനമായാണ് ‘എഡിറ്റ്‌സ്’ എന്ന ആപ്പ് ഒരുക്കിയിരിക്കുന്നത്. ആൻഡ്രോയിഡിലും ഐഒഎസിലും ഇത് ലഭ്യമാണ്. അമേരിക്കയിൽ ടിക് ടോക്കും കാപ്പ് കട്ടും നിരോധിക്കപ്പെട്ട ജനുവരിയിലാണ് മെറ്റ എഡിറ്റ്‌സ് ആപ്പും ആദ്യം പ്രഖ്യാപിച്ചത്. ടിക് ടോക്ക് കുറച്ച് കാലം ഇന്ത്യയിൽ ലഭ്യമായിരുന്നുവെങ്കിലും കാപ്പ് കട്ട് ഇന്ത്യയിൽ എത്തിയിരുന്നില്ല.
ടിക് ടോക്കിന് ഏറെ സ്വീകാര്യതയുണ്ടായിരുന്ന അമേരിക്കയിൽ കാപ്പ് കട്ടിനും ആരാധകർ ഏറെയായിരുന്നു. ഈ രണ്ട് ആപ്പുകളുടെയും അഭാവം ഉപയോഗപ്പെടുത്താനുള്ള ശ്രമമാണ് മെറ്റ നടത്തുന്നത്. ഇൻസ്റ്റഗ്രാം എഡിറ്റ്‌സ് ആപ്പ് ഉപയോഗിച്ച് ഫോണിന്റെ ക്യാമറയിൽ പകർത്തുന്ന ദൃശ്യങ്ങൾ റീൽസ് ആക്കി മാറ്റാനും മെറ്റയുടെ മ്യൂസിക് ലൈബ്രറിയിൽ നിന്ന് പാട്ടുകൾ ചേർക്കാനും സാധിക്കും. കൂടാതെ വാട്ടർമാർക്കുകൾ ഇല്ലാതെ തന്നെ വീഡിയോ എക്‌സ്‌പോർട്ട് ചെയ്യാനുമാവും.
