കൊച്ചി: ഉത്പാദന ചെലവും കൂലി വർദ്ധനവും കണക്കിലെടുത്ത് പാൽ വില കാലോചിതമായി വർദ്ധിപ്പിക്കണമെന്ന് മിൽമ ഫെഡറേഷനോട് ആവശ്യപ്പെടാൻ മിൽമ എറണാകുളം മേഖല യൂണിയൻ ഭരണസമിതി തീരുമാനിച്ചതായി മേഖല ചെയർമാൻ സി എൻ വത്സലൻ പിള്ള പറഞ്ഞു. കഴിഞ്ഞ ദിവസം കൂടിയ ഭരണ സമിതി തീരുമാനം ഫെഡറേഷന് സമർപ്പിച്ചെന്നും ചെയർമാൻ അറിയിച്ചു.
പാൽ വില വർദ്ധനവ് നടപ്പാക്കേണ്ടത് മിൽമ ഫെഡറേഷൻ ആയതിനാൽ അതിനു വേണ്ടി സമ്മർദം ചെലുത്തുമെന്നും ചെയർമാൻ പറഞ്ഞു. കേരളത്തിൽ ക്ഷീര കർഷകർക്ക് ഉത്പാദന ചെലവിന് അനുസരിച്ചുള്ള ന്യായമായ വില ലഭിക്കാത്തതുകൊണ്ട് ചെറുകിട നാമമാത്ര കർഷകരും ഫാം നടത്തുന്നവരും ഉൾപ്പെടെയുള്ളവർക്ഷീരോത്പാദക രംഗത്ത് നിന്നും പിൻമാറുകയാണ്.
കേരളത്തിലെ പാൽ ഉല്പാദനം അനുദിനം കുറഞ്ഞു വരുന്നു. ആഭ്യന്തര ഉപഭോഗം നിറവേറ്റാൻ മറ്റ് സംസ്ഥാനങ്ങളെ കൂടുതലായി ആശ്രയിക്കേണ്ട സ്ഥിതിയാണ്. കാലാവസ്ഥ വ്യതിയാനവും മറ്റ് രോഗങ്ങളും കാരണം ക്ഷീര കർഷക മേഖല സാമ്പത്തികമായി ബുദ്ധിമുട്ടിലാണ്. ക്ഷീര കർഷകർ നേരിടുന്ന മറ്റ് വിഷയങ്ങളിലും സർക്കാരിൻറെ ഭാഗത്തുനിന്ന് സഹായം ലഭിച്ചില്ലെങ്കിൽ ഈ മേഖല വലിയ തകർച്ചയെ നേരിടുമെന്നും ചെയർമാൻ കൂട്ടിച്ചേർത്തു.
കർഷകരെ മേഖലയിൽ പിടിച്ചു നിർത്തുന്നതിന് പാൽ വില ലിറ്ററിന് 10 രുപയെങ്കിലും അടിയന്തിരമായ വർധന ഉടൻ നടപ്പാക്കണമെന്നും ചെയർമാൻ ആവശ്യപ്പെട്ടു. അതോടൊപ്പം ക്ഷീര കർഷക മേഖലയ്ക്ക് ഊന്നൽ നൽകുന്ന പദ്ധതികൾ സർക്കാർ ആസൂത്രണം ചെയ്ത് കർഷകരെ സഹായിക്കണമെന്നും ഭരണ സമിതി യോഗം ആവശ്യപ്പെട്ടതായി ചെയർമാൻ അറിയിച്ചു.
