സംസ്ഥാന സർക്കാർ സ്ഥാപനമായ നോർക്ക ഇൻസ്റ്റിറ്റ്യൂട്ട് ഓഫ് ഫോറിൻ ലാംഗ്വേജസിന്റെ (എൻ.ഐ.എഫ്.എൽ) ഭാഗമായുളള സാറ്റലൈറ്റ് സെന്റർ മലപ്പുറം പെരിന്തൽമണ്ണ അൽഷിഫാ നഴ്സിംങ് കോളേജിൽ നജീബ് കാന്തപുരം എം.എൽ.എ ഉദ്ഘാടനം ചെയ്തു. ചടങ്ങിൽ നോർക്ക റൂട്ട്സ് റസിഡന്റ് വൈസ് ചെയർമാൻ പി. ശ്രീരാമകൃഷ്ൺ അധ്യക്ഷത വഹിച്ചു.
യൂറോനാവ് (EURONAV) ഓവർസീസ് ആൻഡ് എജ്യുക്കേഷണൽ കൺസൾട്ടൻ്റ്സ് പ്രൈവറ്റ് ലിമിറ്റഡ് എന്ന സ്ഥാപനത്തിന്റെ സഹകരണത്തോടെയാണ് സാറ്റലൈറ്റ് സെന്ററിന്റെ പ്രവർത്തനം. ജർമ്മൻ ഭാഷയിൽ ബി 1 വരെയുളള പരിശീലനമാണ് സാറ്റലൈറ്റ് സെന്ററുകൾ വഴി ഇപ്പോൾ ലഭ്യമാകുന്നത്. ചടങ്ങിൽ അൽഷിഫാ നഴ്സിംങ് കോളേജ് പ്രിൻസിപ്പൽ ഡോ. തമിഴ് സെൽവി സ്വാഗതം പറഞ്ഞു. നോർക്ക റൂട്ട്സ് റിക്രൂട്ട്മെന്റ് മാനേജർ പ്രകാശ് പി ജോസഫ്, ഷിഫാ മെഡികെയർ ട്രസ്റ്റ് മാനേജിംങ് ട്രസ്റ്റി ഡോ.പി ഉണ്ണീൻ, യൂറോനാവ് പ്രതിനിധി റോസമ്മ ജോസ് എന്നിവർ സംബന്ധിച്ചു.
എറണാകുളം കോതമംഗലത്തെ മാർ ബസേലിയോസ് നഴ്സിംഗ് കോളേജിലും എൻ.ഐ.എഫ്.എൽ സാറ്റലൈറ്റ് സെന്റർ നിലവിലുണ്ട്. നിലവിൽ ഇരുന്നൂറിലധികം വിദ്യാർത്ഥികൾ സാറ്റലൈറ്റ് സെന്ററിന്റെ സേവനം പ്രയോജനപ്പെടുത്തുന്നുണ്ട്. എൻ.ഐ.എഫ്.എല്ലിന്റെ തിരുവനന്തപുരം കോഴിക്കോട് സെന്ററുകൾക്ക് പുറമേയാണിത്. ഒ ഇ റ്റി, ഐഇഎൽടിഎസ്, ജർമ്മൻ എ 1, എ2, ബി1, ബി2 ലെവൽ വരെയുളള വിവിധ കോഴ്‌സുകൾ എൻ.ഐ.എഫ്.എൽ സെന്ററുകളിൽ നിന്നും ലഭിക്കും. ഐ ഇ എൽ ടി എസ് & ഒഇടി ഓഫ്‌ലൈൻ കോഴ്സിൽ നഴ്സിംഗ് ബിരുദധാരികളായ ബി.പി.എൽ/എസ്.സി/എസ്.ടി വിഭാഗങ്ങളിൽ ഉൾപ്പെടുന്നവർക്ക് ഫീസ് സൗജന്യമാണ്. കൂടുതൽ വിവരങ്ങൾക്ക് +91-7907323505 (തിരുവനന്തപുരം), +91-8714259444 (കോഴിക്കോട്) എന്നീ മൊബൈൽ നമ്പറുകളിലോ നോർക്ക ഗ്ലോബൽ കോൺടാക്ട് സെന്ററിന്റെ ടോൾ ഫ്രീ നമ്പറുകളായ 1800 425 3939 (ഇന്ത്യയിൽ നിന്നും) +91-8802 012 345 (വിദേശത്തുനിന്നും, മിസ്ഡ് കോൾ സർവീസ്) ബന്ധപ്പെടാവുന്നതാണ്.
