തിരുവനന്തപുരം: ഒരച്ഛൻ മകളിലൂടെ വരെ അഴിമതി നടത്തുന്നതു കേരളം കാണുന്നതും ഇതാദ്യം.അഴിമതിയിൽ മുങ്ങിയ സി പി എമ്മിന്റെ അന്തകനും ആരാച്ചാരുമായി പിണറായി വിജയൻ മാറിയെന്ന് കെ പി സി സി പ്രസിഡന്റ് കെ സുധാകരൻ പറ‌ഞ്ഞു.കേരളം കണ്ട ഏറ്റവും വലിയ അഴിമതിയായ ലാവ്‌ലിൻ ഇടപാടിൽ പിണറായി വിജയനെ പാർട്ടി സംരക്ഷിച്ചതിനുള്ള ശിക്ഷയാണ് മാസപ്പടി കേസിലെ കുറ്റപത്രം.
അഴിമതി വീരൻ പിണറായി വിജയനെ സംരക്ഷിച്ച പാർട്ടി കോൺഗ്രസിന്റെ നടപടി മൂലം സിപിഎം ദേശീയതലത്തിൽ പോലും ലജ്ജിച്ചു തലതാഴ്ത്തി നിൽക്കുകയാണെന്ന് .പിണറായി സർക്കാരിന്റെ നേട്ടങ്ങൾ രാജ്യം മുഴുവൻ എത്തിക്കാൻ നടത്തിയ പാർട്ടി കോൺഗ്രസ് മുഖ്യമന്ത്രിയുടെ അഴിമതികൾ കേട്ട് തരിച്ചിരിക്കുകയാണ്. പാർട്ടി കോൺഗ്രസിൽ ബോംബ് വീണിട്ടും ആളനക്കമില്ല. ഒരക്ഷരം പോലും എതിർത്തു പറയാൻ നട്ടെല്ലുള്ള ഒരു നേതാവുപോലും ആ പാർട്ടിയിൽ ഇല്ലാതായി.
പാർട്ടി കോൺഗ്രസിൽ കട്ടൻ ചായയും പരിപ്പുവടയും വരെ പിണറായി വിജയൻ സ്‌പോൺസർ ചെയ്യുമ്പോൾ ആർക്കാണ് എതിർത്തു പറയാൻ കഴിയുക? സി പി എമ്മിന്റെ അന്നദാതാവായ പിണറായിക്കുവേണ്ടി പാർട്ടി കോൺഗ്രസ് തിരുവാതിര വരെ കളിക്കും. പൊളിറ്റ് ബ്യൂറോയും കേന്ദ്രകമ്മിറ്റിയുമൊക്കെ കൈകൊട്ടി കളിക്കും. പിണറായി വിജയന് മാത്രം പ്രായപരിധിയിൽ ഇളവ് നൽകും. ബാക്കിയുള്ളവരൊക്കെ പൊളിറ്റ് ബ്യൂറോയിൽനിന്ന് കടക്കൂ പുറത്ത് എന്ന അവസ്ഥയാണെന്നും സുധാകരൻ ചൂണ്ടികാട്ടി.
സംഘപരിവാറിനെ കൂട്ടുപിടിച്ചുള്ള പിണറായി വിജയന്റെ രാഷ്ട്രീയാഭ്യാസങ്ങൾ സി പി എം അഖിലന്ത്യാ നേതൃത്വത്തിനും അറിയാം. പക്ഷേ എല്ലാവരും നിസഹായർ. 55 ദിവസം പിന്നിടുന്ന ആശാവർക്കർമാരുടെ സമരം ഒത്തുതീർക്കണമെന്ന് പാർട്ടി കോൺഗ്രസിൽ മുറവിളി ഉയർന്നെങ്കിലും അന്നദാതാവ് അതുപോലും പരിഗണിച്ചില്ല. സി പി എം നേരിടുന്ന അഗാധമായ പ്രതിസന്ധി പരിഹരിക്കാൻ പാർട്ടി പ്രവർത്തകരെങ്കിലും മുന്നോട്ടു വരണമെന്നും സുധാകരൻ അഭ്യർത്ഥിച്ചു.