കണ്ണൂർ :ഭരണഘടന മൂല്യങ്ങൾ രാജ്യത്തെ ജനങ്ങൾക്ക് നൽകുന്ന അധികാരങ്ങളും അവകാശങ്ങളും സംരക്ഷിക്കാൻ നമുക്ക് ഓരോരുത്തർക്കും ഉത്തരവാദിത്തമുണ്ടെന്ന് മന്ത്രി രാമചന്ദ്രൻ കടന്നപ്പള്ളി പറഞ്ഞ ' കണ്ണൂർ കലക്ടറേറ്റ് മൈതാനിയിൽ ജില്ലാ തല സ്വാതന്ത്ര്യദിനാഘോഷ ചടങ്ങിൽ ദേശീയപതാക ഉയർത്തി പരേഡിന്റെ അഭിവാദ്യം സ്വീകരിച്ച ശേഷം സ്വാതന്ത്ര്യദിന സന്ദേശം നൽകുകയായിരുന്നു മന്ത്രി. രാജ്യത്തിന്റെ പരമാധികാരവും മതേതരത്വവും സംരക്ഷിച്ചേ പറ്റൂ.
ജനാധിപത്യം പരിപാലിക്കപ്പെടണം. അതിനായി വീണ്ടും ഒരു സ്വാതന്ത്ര്യ സമരം ആവശ്യമാണെങ്കിൽ പോലും നാമെല്ലാവരും അണിനിരക്കാൻ പ്രതിജ്ഞാബദ്ധരാണെന്നും മന്ത്രി പറഞ്ഞു. സമാധാനത്തിന്റെ മാർഗ്ഗത്തിൽ ഭരണഘടന മൂല്യങ്ങളും ആ മൂല്യങ്ങൾ ജനങ്ങൾക്ക് നൽകുന്ന അധികാരങ്ങളും അവകാശങ്ങളും സംരക്ഷിക്കാൻ രാജ്യത്തിന് ഉത്തരവാദിത്തമുണ്ട്. ഏതെങ്കിലും വിശ്വാസികൾക്ക്, മത വിഭാഗത്തിൽപ്പെട്ടവർക്ക്, ഒരു ജാതിയിൽപ്പെട്ടവർക്ക് കണ്ണുനീർ ഒഴുക്കേണ്ട സാഹചര്യം ഉണ്ടാകരുത്. ഇന്ത്യയിൽ എല്ലാവർക്കും ഒരുപോലെ ജീവിക്കാൻ കഴിയണം. ഒരുപോലെ പ്രവർത്തിക്കാനും ജീവിക്കാനും കഴിയുന്ന സമത്വ സുന്ദരമായ ജനാധിപത്യ അവകാശങ്ങളും മതേതരത്വ അവകാശങ്ങളും സൂക്ഷിച്ചു കൊണ്ടാണ് നമ്മുടെ രാജ്യം ലോകത്തിന്റെ ശ്രദ്ധയിൽ നിറഞ്ഞു നിൽക്കുന്നത്. രാജ്യത്തിന്റെ മുന്നോട്ടുള്ള പ്രയാണവും ലോകം ശ്രദ്ധിക്കുകയാണെന്നും മന്ത്രി പറഞ്ഞു.
പ്രാദേശിക സ്ഥാപനങ്ങൾ മുതൽ ഇന്ത്യൻ പാർലമെന്റ് വരെ ജനങ്ങൾക്ക് വേണ്ടിയുള്ളതാണ്. ഇത്തരം സ്ഥാപനങ്ങളെ ദുർബലമാക്കാനും കീഴ്‌പ്പെടുത്തുവാനുമുള്ള ഏത് ശ്രമങ്ങളും രാജ്യത്തിന് ഗുണകരമായിരിക്കില്ല. മഹാത്മാഗാന്ധി ഉൾപ്പെടെയുള്ള മഹാ ധീര ദേശാഭിമാനികൾ നേടിയെടുത്ത സ്വാതന്ത്ര്യം നിലനിർത്തിയെ പറ്റൂ. സൂര്യൻ അസ്തമിക്കാത്ത സാമ്രാജ്യത്വ ശക്തികൾക്ക് മുന്നിൽ നമ്മുടെ മഹാരാജ്യത്തിന്റെ സ്വാതന്ത്ര്യത്തിനായി ജീവൻ സമർപ്പിച്ചവരെ നാം വിസ്മരിക്കരുത്. സ്വാതന്ത്ര്യത്തിനുവേണ്ടി സമരപഥങ്ങളിൽ ജീവൻ ബലിയർപ്പിച്ച രക്തസാക്ഷികളുടെ പാവനമായ ഓർമ്മകൾക്ക് മുൻപിൽ ആദരാഞ്ജലികൾ അർപ്പിക്കുന്നതായും മന്ത്രി പറഞ്ഞു.
ദേശീയപതാക ഉയർത്തിയശേഷം മന്ത്രി രാമചന്ദ്രൻ കടന്നപ്പള്ളി തുറന്ന ജീപ്പിൽ പരേഡ് പരിശോധിച്ചു. മാങ്ങാട്ട്പറമ്പ് കെ.എ.പി നാലാം ബറ്റാലിയൻ, കണ്ണൂർ സിറ്റി പോലീസ്, കണ്ണൂർ റൂറൽ ജില്ലാ പോലീസ്, വനിതാ പോലീസ്, എക്‌സൈസ്, വനംവകുപ്പ്, എൻ.സി.സി., എസ്.പി.സി, സ്‌കൗട്ട്, ഗൈഡ്സ്, റെഡ് ക്രോസ് എന്നിവയുടെ ഉൾപ്പെടെ 18 പ്ലേറ്റൂണുകൾ പരേഡിൽ അണിനിരന്നു. ഡി.എസ്.സി, ആർമി പബ്ലിക് സ്‌കൂൾ, സെന്റ് തെരേസാസ് എ.ഐ.എച്ച്.എസ്.എസ് ബർണശ്ശേരി ബാൻഡുകളും പരേഡിൽ അണിനിരന്നു. കണ്ണപുരം പോലീസ് സ്റ്റേഷൻ എസ്.ഐ.മഹേഷ് കടമ്പത്തായിരുന്നു പരേഡ് കാമാൻഡർ. തലശ്ശേരി സ്റ്റേഷൻ എസ്.ഐ ഷാഫത്ത് മുബാറക്ക് സെക്കൻഡ് ഇൻ കാമാൻഡറായി.
സേനാവിഭാഗത്തിൽ മാങ്ങാട്ടുപറമ്പ് കെ പി നാലാം ബറ്റാലിയൻ മികച്ച പരേഡിനുള്ള ഒന്നാം സ്ഥാനംനേടി. എൻസിസി സീനിയർ വിഭാഗത്തിൽ തോട്ടട ഗവ. പോളിടെക്‌നിക് കോളേജ് ഒന്നാം സ്ഥാനം നേടി. സ്റ്റുഡൻസ് പോലീസ് കേഡറ്റ് വിഭാഗത്തിൽ അഞ്ചരക്കണ്ടി ഹയർസെക്കൻഡറി സ്‌കൂൾ, സ്‌കൗട്ട് വിഭാഗത്തിൽ കണ്ണൂർ എസ് എൻ ട്രസ്റ്റ് സ്‌കൂൾ, ഗൈഡ്സ് വിഭാഗത്തിൽ പയ്യാമ്പലം ഗേൾസ് ഹയർ സെക്കൻഡറി സ്‌കൂൾ എന്നിവർ ഒന്നാം സ്ഥാനം നേടി. റെഡ് ക്രോസ് വിഭാഗത്തിൽ കൂടാളി ഹയർസെക്കൻഡറി സ്‌കൂളിനാണ് ഒന്നാം സ്ഥാനം.
സ്വാതന്ത്ര്യദിനാഘോഷങ്ങളുടെ ഭാഗമായി ജില്ലാ ഇലക്ഷൻ വിഭാഗം വിദ്യാർഥികൾക്കായി സംഘടിപ്പിച്ച ഇലക്ടോപിച്ച്, ക്വിസ് മത്സരവിജയികൾ മന്ത്രിയിൽ നിന്നും സമ്മാനങ്ങൾ ഏറ്റുവാങ്ങി. കൊട്ടിയൂർ ഐ ജെ എം എച്ച്എസ്എസ് വിദ്യാർത്ഥി അമൽ സെബാസ്റ്റ്യൻ, കണ്ണൂർ എസ് എൻ കോളേജ് വിദ്യാർഥി പി എസ് ജന്നത്ത്, ഇരിട്ടി എംജി കോളേജ് വിദ്യാർത്ഥി ബി അനുനന്ദ എന്നിവർക്കാണ് ഒന്ന്, രണ്ട്, മൂന്ന് സ്ഥാനങ്ങൾ. ക്വിസ് മത്സരത്തിൽ ഗവ ബ്രണ്ണൻ കോളേജ് വിദ്യാർഥികളായ കെ സി ദ്രുപത്, പൃഥ്വി പവിത്രൻ എന്നിവർക്കാണ് ഒന്നാം സ്ഥാനം. കണ്ണൂർ ചിന്മയ ആർട്‌സ് ആൻഡ് സയൻസ് കോളേജ് വിദ്യാർഥികളായ കൃഷ്‌ണേന്ദു എം നായർ, എൻ ആർ സുമയ്യ, പൂർണ്ണ ശ്രീനിവാസൻ എന്നിവർ രണ്ടാം സ്ഥാനവും തളിപ്പറമ്പ് സർ സയ്യിദ് കോളജ് വിദ്യാർഥികളായ കെ പി ആദ്യ, ഡി.അഞ്ജന, ശിവാനി എസ് ബിജു എന്നിവർ മൂന്നാം സ്ഥാനവും നേടി. തുടർന്ന് ജില്ലയിലെ സംഗീത അധ്യാപകർ ദേശഭക്തിഗാനം ആലപിച്ചു.
കണ്ണൂർ കോർപ്പറേഷൻ മേയർ മുസ്ലിഹ് മഠത്തിൽ, കെ.വി.സുമേഷ് എം.എൽ.എ, ജില്ലാ പഞ്ചായത്ത് പ്രസിഡന്റ് അഡ്വ.കെ.കെ.രത്നകുമാരി, ജില്ലാ കലക്ടർ അരുൺ കെ.വിജയൻ, ഡെപ്യൂട്ടി മേയർ പി ഇന്ദിര, സിറ്റി പോലീസ് കമ്മീഷണർ പി. നിതിൻരാജ്, റൂറൽ എസ്.പി അനൂജ് പലിവാൽ, അസിസ്റ്റന്റ് കലക്ടർ എഹ്തദെ മുഫസിർ, ഡി.എഫ്.ഒ എസ്. വൈശാഖ്, എ.ഡി.എം കല ഭാസ്‌കർ തുടങ്ങിയവർ പങ്കെടുത്തു.
