തിരുവല്ല : തിരുവല്ലയിലെ കടപ്രയിൽ ആളൊഴിഞ്ഞ വീട്ടിൽ യുവാക്കൾ അടങ്ങുന്ന സംഘം നടത്തുന്ന പരസ്യ മദ്യപാനവും അസഭ്യവും സഹിക്കവയ്യാതെ പോലീസിനെ വിവരം അറിയിച്ചതിൻറെ പേരിൽ ഗൃഹനാഥനും കുടുംബത്തിനും നേരെ വധഭീഷണി എന്ന് പരാതി. കടപ്ര പതിനാലാം വാർഡിൽ എസ് എസ് വില്ലയിൽ ഷിബു എന്ന് വിളിക്കുന്ന വിദേശ മലയാളിയായ ഫിലിപ്പ് ജോർജിനും കുടുംബത്തിനും നേരെയാണ് നാലോളം പേർ വരുന്ന സംഘം വധഭീഷണി മുഴക്കിയതായി പരാതി ഉയരുന്നത്.
സംഭവം സംബന്ധിച്ച് ഫിലിപ്പ് പുളിക്കീഴ് പോലീസിൽ പരാതി നൽകി. ഇക്കഴിഞ്ഞ ഞായറാഴ്ച രാവിലെ 12 മണിയോടെ ആണ് പരാതിക്ക് അടിസ്ഥാനമായ സംഭവം നടന്നത്. രാവിലെ 11 മണിയോടെ പ്രദേശവാസികൾ അടക്കം ഉൾപ്പെടുന്ന പത്തോളം പേരടങ്ങുന്ന സംഘം ഫിലിപ്പ് ജോർജിന്റെ വീടിന്റെ എതിർവശത്ത് താമസമില്ലാതെ കിടക്കുന്ന വീട്ടുവളപ്പിൽ മണിക്കൂറുകളോളം മദ്യപിക്കുകയും പരസ്പരം അസഭ്യം പറയുകയും ബഹളമുണ്ടാക്കുകയും ചെയ്തു. ഇത് സഹിക്കവയ്യാതെ വന്നതോടെ ഫിലിപ്പ് പുളിക്കീഴ് പോലീസിൽ വിവരം അറിയിച്ചു. 10 മിനിറ്റുകൾക്കും പോലീസ് സ്ഥലത്തെത്തി. പോലീസ് ജീപ്പ് വരുന്നത് കണ്ട് സംഘം ചിതറി ഓടി. മദ്യപിച്ച് അവശനിലയിൽ ആയിരുന്ന മൂന്നു പേരെ പോലീസ് കസ്റ്റഡിയിൽ എടുത്ത് സ്റ്റേഷനിലേക്ക് കൊണ്ടുപോയി. തുടർന്ന് കോൺഗ്രസ് പ്രാദേശിക നേതാവിൻറെ ഇടപെടലിനെ തുടർന്ന് മൂവരേയും ജാമ്യത്തിൽ വിട്ടയച്ചു. ഇതിന് പിന്നാലെയാണ് 12 മണിയോടെ നാലാംഗ സംഘം ഫിലിപ്പിന്റെ വീട്ടിലെത്തി വധഭീഷണി മുഴക്കിയത്. വീടിൻറെ ഗേറ്റ് തള്ളി തുറക്കാൻ ശ്രമിച്ചപ്പോൾ വളർത്തുനായ ഇവർക്ക് നേരെ കുരച്ചുചാടി.
ഇതോടെ സംഘത്തിൽ ഒരുവൻ നായയെ വടി ഉപയോഗിച്ച് ആക്രമിച്ചു. നായയുടെ കുരകേട്ട് ഫിലിപ്പിന്റെ ഭാര്യ സൂസൻ പുറത്തേക്ക് ഇറങ്ങി വന്നു. ഇതോടെ സംഘം ഇവരെ അസഭ്യം പറയുകയും ഫിലിപ്പിനെ അടക്കം വധിക്കുമെന്ന് ഭീഷണിപ്പെടുത്തുകയും ആയിരുന്നു എന്നാണ് പോലീസിൽ നൽകിയ പരാതിയിൽ പറയുന്നത്. സംഭവ സമയം ഫിലിപ്പ് ജോർജ് വീട്ടിൽ ഉണ്ടായിരുന്നില്ല. മൊബൈൽ ഫോണിൽ സൂസൻ ഭർത്താവിനെയും പോലീസ് സ്റ്റേഷനിലും വിവരമറിയിച്ചു. പോലീസിൽ വിവരം അറിയിക്കുന്നത് ശ്രദ്ധയിൽപ്പെട്ട സംഘം വീടിൻറെ ഗേറ്റിനു മുമ്പിൽ നിന്നും മാറി കൊലവിളി തുടർന്നു.
ഇതിനിടെ സൂസൻ യുവാക്കൾ വധഭീഷണി മുഴക്കുന്ന ശബ്ദം മൊബൈൽ ഫോണിൽ റെക്കോർഡ് ചെയ്തു. തുടർന്ന് പോലീസ് സംഘം സ്ഥലത്ത് എത്തുമ്പോൾ എത്തുമ്പോൾ ഫിലിപ്പ് ജോർജിന്റെ ഉടമസ്ഥതയിലുള്ള എസ് എസ് റസിഡൻസി എന്ന ഹോംസ്റ്റേഴ് സ്ഥാപനത്തിന് നേരെ യുവാക്കൾ പടക്കം എറിയുകയായിരുന്നു. പടക്കങ്ങൾ പിടിച്ചെടുത്ത പോലീസ് നാലംഗ സംഘത്തെ സ്ഥലത്ത് നിന്നും തുരത്തിയ ശേഷം മടങ്ങുകയായിരുന്നു എന്ന് ഫിലിപ്പ് പറഞ്ഞു. ഇതേ തുടർന്നാണ് തിങ്കളാഴ്ച ഫിലിപ്പ് പോലീസിൽ പരാതി നൽകിയത്. പരാതിയിൽ തുടർനടപടി ഒന്നും തന്നെ ഉണ്ടായില്ല എന്നും നടപടി ഉണ്ടായില്ല ഫിലിപ്പ് ജോർജ് പറഞ്ഞു.
