അശ്ലീല സന്ദേശങ്ങള്‍ അയച്ചെന്ന യുവനടിയുടെ വെളിപ്പെടുത്തലിനെ തുടര്‍ന്ന് യൂത്ത് കോണ്‍ഗ്രസ് അധ്യക്ഷ സ്ഥാനം ഒഴിഞ്ഞ രാഹുല്‍ മാങ്കൂട്ടത്തില്‍ എംഎല്‍എക്കെതിരെ കൂടുതല്‍ വെളിപ്പെടുത്തലുകള്‍ ഇന്നുണ്ടായേക്കും. രാഹുല്‍ മാങ്കൂട്ടത്തില്‍ എംഎല്‍എ സ്ഥാനം ഒഴിയണമെന്നാവശ്യപ്പെട്ട് സിപിഎം, ബിജെപി പ്രവര്‍ത്തകരുടെയും യുവജന സംഘടനകളുടെയും പ്രതിഷേധം ഇന്നും തുടരും. രാഹുല്‍ മാങ്കൂട്ടത്തിലിന്റെ പത്തനംതിട്ട അടൂരിലെ വീട്ടിലേക്കും പ്രതിഷേധത്തിന് സാധ്യതയുണ്ട്. അതേസമയം, രാഹുല്‍ മാങ്കൂട്ടത്തില്‍ യുത്ത് കോണ്‍ഗ്രസ് അധ്യക്ഷ സ്ഥാനം ഒഴിഞ്ഞതോടെ പുതിയ പ്രസിഡന്റിനെ കണ്ടെത്താനുള്ള ചര്‍ച്ചകളും സജീവമാണ്.
നിലവിലെ വൈസ് പ്രസിഡന്റുമാരായ അബിന്‍ വര്‍ക്കി, ഒ ജെ ജനീഷ് , ദേശീയ സെക്രട്ടറി ബിനു ചുള്ളിയില്‍ കെഎസ്‌യു മുന്‍ സംസ്ഥാന പ്രസിഡന്റ് കെ എം അഭിജിത്ത് എന്നിവരുടെ പേരുകളാണ് പരിഗണനയിലുള്ളത്. കെപിസിസി പ്രസിഡന്റ്, കെഎസ്‌യു , മഹിളാ കോണ്‍ഗ്രസ് പ്രസിഡന്റുമാര്‍ എന്നിവര്‍ ന്യൂനപക്ഷ വിഭാഗത്തില്‍ നിന്നായതിനാല്‍ അബിന്‍ വര്‍ക്കിയെ പരിഗണിക്കാന്‍ സാധ്യത കുറവാണ്.
കെ സി വേണുഗോപാല്‍ പക്ഷക്കാരനായ ബിനു ചുള്ളിയില്‍ രാഹുല്‍ പ്രസിഡന്റായ സമയത്ത് തന്നെ യൂത്ത് കോണ്‍ഗ്രസ് അധ്യക്ഷ സ്ഥാനത്തേക്ക് പറഞ്ഞു കേട്ട പേരുകളിലൊന്നാണ്. ദേശീയ കമ്മിറ്റി പുനസംഘടനയില്‍ പരിഗണിക്കപ്പെടാതെ പോയ കെ എം അഭിജിത്തിനായി കേരളത്തിലെ മുതിര്‍ന്ന നേതാക്കള്‍ നീക്കം നടത്തുന്നുണ്ട്. സ്ഥിരം പ്രസിഡന്റിനെ വെയ്ക്കണോ ആര്‍ക്കെങ്കിലും താത്കാലിക ചുമതല നല്‍കണോ എന്നകാര്യത്തില്‍ ദേശീയ നേതൃത്വം തീരുമാനമെടുക്കും.