ബോക്‌സ് ഓഫീസിൽ മികച്ച പ്രകടനവുമായി മുന്നോട്ടു പോവുകയാണ് മോഹൻലാൽ-തരുൺ മൂർത്തി ചിത്രം തുടരും. സിനിമയ്ക്ക് റിലീസ് ദിവസം മുതലേ പോസിറ്റീവ് പ്രതികരണമായിരുന്നു ലഭിച്ചത്.
ഒരു ടാക്‌സി ഡ്രൈവറുടെ വേഷത്തിൽ മോഹൻലാൽ എത്തിയ സിനിമ മികച്ച അഭിനയ മുഹൂർത്തങ്ങൾക്കൊപ്പം ത്രില്ലിങ്ങായ സ്റ്റോറി ടെല്ലിങ്ങും പ്രേക്ഷകർക്കായി സമ്മാനിച്ചിരുന്നു. ഇതിനൊപ്പം ബോക്‌സ് ഓഫീസിലും ഒന്നിനു പുറകെ ഒന്നായി റെക്കോർഡുകളും ചിത്രം തീർത്തിരുന്നു.
100 കോടിയും 200 കോടിയുമെല്ലാം അതിവേഗം നേടിയ ചിത്രം കേരളാ ബോക്‌സ് ഓഫീസിലും ഒന്നാമനായിരുന്നു. ഇപ്പോൾ മലയാള സിനിമയ്ക്ക് ഇതുവരെ എത്തിപ്പിടിക്കാനാകാത്ത ഒരു നേട്ടവും തുടരും അനായാസം സ്വന്തമാക്കിയിരിക്കുകയാണ്.
ട്രാക്കേഴ്‌സ് പുറത്തുവിടുന്ന റിപ്പോർട്ട് പ്രകാരം, ചിത്രത്തിന്റെ ഷോകളിൽ നിന്ന് മാത്രമായി 100 കോടിയാണ് സിനിമ സ്വന്തമാക്കിയിരിക്കുന്നത്. ട്രാക്കഡ് കളക്ഷനിൽ മലയാളം സിനിമ ആദ്യമായാണ് ഈ നേട്ടം സ്വന്തമാക്കുന്നത്.
കേരളാ ബോക്‌സ് ഓഫീസിൽ 110 കോടിയ്ക്ക് മുകളിലും ആഗോളതലത്തിൽ 220 കോടിയ്ക്ക് മുകളിലുമാണ് തുടരും ഇതുവരെ നേടിയിരിക്കുന്നത്. 24 ദിവസങ്ങൾക്ക് ശേഷവും ഹൗസ് ഫുൾ ഷോസുമായാണ് മോഹൻലാൽ ചിത്രം മുന്നേറുന്നത്. അതുകൊണ്ട് എമ്പുരാന്റെ ഇൻഡസ്ട്രി ഹിറ്റ് പദവിയും മോഹൻലാൽ തന്നെ ഒരുപക്ഷെ തിരുത്തികുറിച്ചേക്കാം.
