ഫോൺ ഒന്ന് നിന്നുപോയാൽ, അല്ലെങ്കിൽ അമിതമായി വേഗത കുറഞ്ഞാൽ, എന്തെങ്കിലും ആപ്പുകൾ പ്രവർത്തിച്ചിട്ടില്ലെങ്കിൽ, നമ്മൾ ആദ്യം ചെയ്യുന്നത് ഫോൺ ഒന്ന് റീസ്റ്റാർട്ട് ചെയ്യുക ആണല്ലോ. ഇങ്ങനെ ചെയ്യുമ്പോൾ ഫോൺ വേഗത കൂടും എന്നൊരു വിശ്വാസം നമുക്ക് ഉണ്ട്. എന്നാൽ ഇത് ചെയ്യാത്തവരുമുണ്ട്.
റാം തന്നെയാണ് എല്ലാത്തിനും കാരണം . ഫോണിലെ റാം. നമ്മൾ ഉപയോഗിക്കുന്ന ഓരോ ആപ്പുകൾക്കും ആവശ്യമായ മെമ്മറി നൽകി അവയെ നിലനിർത്തുന്ന ഈ റാം, പ്രോസസറിന്റെ സഹായത്തോടെ കാര്യങ്ങൾ സുഗമമാക്കുന്നു. പക്ഷെ ആപ്പുകൾ കൂടുതലായി ഉപയോഗിക്കുന്നതിലൂടെ ഈ റാം മെമ്മറി തീരുകയും അത് ഫോൺ പ്രവർത്തനങ്ങളെ ബാധിക്കുകയുമാണ് ചെയ്യുന്നത്.
റാമും മറ്റ് ആപ്ലിക്കേഷനുകളും നിറഞ്ഞതിനാൽ ഫോൺ പ്രവർത്തിക്കുന്നത് മന്ദഗതിയിലാകുന്നു. വേഗത്തിൽ ബാറ്ററി തീർന്നുപോകുന്നു, ഓപ്പറേറ്റിങ് സിസ്റ്റം ഹാങ് ആവുകയോ, ഫ്രീസ് ആവുകയോ തെയ്യും. അപ്‌ഡേറ്റുകൾ കൃത്യമായി ഇൻസ്റ്റാൾ ചെയ്യപ്പെടില്ല. തന്നെയുമല്ല നെറ്റ്‌വർക്ക് പ്രശ്‌നങ്ങളോ, കാൾ പ്രശ്‌നങ്ങളോ ഉണ്ടാകാൻ ഇടയുണ്ട്.
പതിവായി റീസ്റ്റാർട്ട് ചെയ്യാതിരിക്കുന്നത് അപ്‌ഡേറ്റുകൾ തടസ്സപ്പെടുത്തുകയും സോഫ്റ്റ്‌വെയർ, ഓഎസ് അപ്‌ഡേറ്റുകൾ കൃത്യമായി നടപ്പിലാക്കുന്നത് തടയുകയും ചെയ്യും. അത്യാവശ്യമായ സെറ്റിങ്ങ്‌സുകൾ, ഡേറ്റ അപ്‌ഡേറ്റ് എന്നിവയെയും അത് ബാധിക്കും. ഇപ്രകാരം ചെയ്തില്ലെങ്കിൽ കോളുകൾ ഇടയ്ക്ക് കട്ടായിപോകുന്നതിനും നെറ്റ്‌വർക്ക് കണക്ടിവിറ്റിക്കും കാരണമാകും.
പതിവായി റീസ്റ്റാർട്ട് ചെയ്യുന്നത് മെമ്മറി ക്ലിയർ ചെയ്യുന്നതിനും സിസ്റ്റം സ്റ്റബിലിറ്റി മെച്ചപ്പെടുത്തുന്നതിനും ചെറിയ സോഫ്റ്റ്‌വെയർ ബഗുകൾ ഫിക്‌സ് ചെയ്യുന്നതിനും സഹായിക്കും. നെറ്റ്‌വർക്ക് കണക്ടിവിറ്റി മെച്ചപ്പെടുത്തുന്നതിനും അപ്‌ഡേറ്റുകൾ കൃത്യമായി ഇൻസ്റ്റാൾ ചെയ്യുന്നതിനും ഇത് സഹായിക്കും. ഒപ്പം ഫോൺ അമിതമായി ചൂടാകുന്നത് തടയും.
ആഴ്ചയിൽ ഒരു തവണ എങ്കിലും ഫോൺ റീസ്റ്റാർട്ട് ചെയ്യണം. അതുപോലെ സോഫ്റ്റ്‌വെയർ അപ്‌ഡേറ്റിന് ശേഷവും ഫോണിന്റെ പ്രവർത്തനം മന്ദഗതിയിലാകുമ്പോഴും അമിതമായി ചൂടാകുമ്പോഴും ഫോൺ റീസ്റ്റാർട്ട് ചെയ്യാം
