ഇന്ത്യന്‍ ടെലിവിഷന്‍ സീരിയല്‍ മേഖലയില്‍ ഏറ്റവും കൂടുതല്‍ പ്രതിഫലം വാങ്ങുന്ന അഭിനേത്രിയായി മുന്‍കേന്ദ്രമന്ത്രി സ്മൃതി ഇറാനി. ഒരു എപ്പിസോഡിന് 14 ലക്ഷം രൂപ പ്രതിഫലം വാങ്ങുന്നുവെന്നായിരുന്നു പ്രാചരണം. ഇപ്പോള്‍ സ്മൃതി തന്നെ സ്ഥിരീകരണവുമായി രംഗത്തെത്തി. ഏറ്റവും കൂടുതല്‍ പ്രതിഫലം വാങ്ങുന്ന ടെലിവിഷന്‍ നടിയാണ് താനെന്ന് സ്മൃതി ഇറാനി സിഎന്‍എന്‍-ന്യൂസ് 18 ന് നല്‍കിയ അഭിമുഖത്തില്‍ പറഞ്ഞു. അതേസമയം, എത്രയാണ് പ്രതിഫലമെന്ന് വെളിപ്പെടുത്തിയതുമില്ല. ക്യുങ്കി സാസ് ഭി കഭി ബഹു തി 2 എന്ന സീരിയലിലൂടെയാണ് സ്മൃതി ഇറാനി അഭിനയരംഗത്തേക്ക് തിരിച്ചുവന്നത്. തുളസി വിരാനി എന്ന കഥാപാത്രത്തെയാണ് താരം അവതരിപ്പിച്ചത്.
ഒരു പ്രൊഫഷണലെന്ന നിലയില്‍, എത്രയാണ് പ്രതിഫലം ലഭിക്കുന്നതെന്ന് പറയാനാകില്ല, നാമെല്ലാവരും ഒരു വലിയ സ്ഥാപനത്തിന്റെയും ജോലിയുടെയും ഭാഗമാണെന്നും സഹതാരങ്ങളുടെ കരിയര്‍ ഉയര്‍ത്താനുള്ള കഴിവ് തനിക്കുണ്ടെന്നും സ്മൃതി ഇറാനി അവകാശപ്പെട്ടു. ഇന്ത്യന്‍ ടെലിവിഷനിലെ ഏറ്റവും വിജയകരമായ ഷോകളില്‍ ഒന്നായിരുന്നു 'ക്യുങ്കി സാസ് ഭി കഭീ ബഹു ഥി'. മാതൃക മരുമകളായ തുളസി വിരാനി (സ്മൃതി ഇറാനി)യുടെ കഥയാണ് ശോഭ കപൂറും ഏക്ത കപൂറും ചേര്‍ന്ന് നിര്‍മ്മിച്ച പരമ്പരയുടെ ഇതിവൃത്തം.
2000 മുതല്‍ 2008 വരെയാണ് 'ക്യുങ്കി സാസ് ഭി കഭി ബഹു ഥി' ടെലിവിഷനില്‍ സംപ്രേഷണം ചെയ്തത്. ഏഴ് വര്‍ഷത്തോളം ടിആര്‍പി ചാര്‍ട്ടുകളില്‍ ഒന്നാം സ്ഥാനത്തെത്തി. ഈ പരമ്പരയിലൂടെ ഇന്ത്യന്‍ ടെലിവിഷന്‍ അക്കാദമി അവാര്‍ഡുകളില്‍ നിന്ന് മികച്ച നടി - ജനപ്രിയ വിഭാഗത്തില്‍ സ്മൃതി തുടര്‍ച്ചയായി അഞ്ച് അവാര്‍ഡുകളും നേടി. ഈ പരമ്പര 1500 ലധികം എപ്പിസോഡുകള്‍ പൂര്‍ത്തിയാക്കി.