വേളാങ്കണ്ണി ആരോഗ്യമാതാവിന്റെ വാർഷിക പെരുന്നാളിനോടനുബന്ധിച്ച്‌ യാത്രത്തിരക്ക് കുറയ്ക്കാൻ എറണാകുളം, തിരുവനന്തപുരം എന്നിവിടങ്ങളില്‍നിന്ന് വേളാങ്കണ്ണിയിലേക്ക് പ്രത്യേക തീവണ്ടികള്‍ സർവീസ് നടത്തും.എറണാകുളം ജങ്ഷനില്‍നിന്ന് ഓഗസ്റ്റ് 27, സെപ്റ്റംബർ മൂന്ന്, 10 എന്നീ തീയതികളില്‍ രാത്രി 11.50-ന് പുറപ്പെടുന്ന തീവണ്ടി (06061) പിറ്റേന്ന് ഉച്ചയ്ക്ക് 3.15-ന് വേളാങ്കണ്ണിയിലെത്തും.
വേളാങ്കണ്ണിയില്‍നിന്ന് ഓഗസ്റ്റ് 28, സെപ്റ്റംബർ നാല്, 11 എന്നീ തീയതികളില്‍ വൈകീട്ട് 6.40-ന് പുറപ്പെടുന്ന തീവണ്ടി (06062) പിറ്റേന്നു രാവിലെ 11.55-ന് എറണാകുളം ജങ്ഷനിലെത്തും. ചെങ്കോട്ടവഴിയുള്ള വണ്ടിയില്‍ ഒരു സെക്കൻഡ് എസി കോച്ച്‌, മൂന്ന് എസി ത്രി ടിയർ കോച്ചുകള്‍, എട്ട് സ്ലീപ്പർ കോച്ചുകള്‍, ഒരു ജനറല്‍ കോച്ച്‌ എന്നിവയുണ്ടാകും.
കേരളത്തില്‍ കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര, കായംകുളം, കരുനാഗപള്ളി, ശാസ്താംകോട്ട, കൊല്ലം, കുണ്ടറ, കൊട്ടാരക്കര, ആവണീശ്വരം, പുനലൂർ എന്നിവിടങ്ങളില്‍ സ്റ്റോപ്പുണ്ടാകും.
തിരുവനന്തപുരം സെൻട്രല്‍-വേളാങ്കണ്ണി പ്രത്യേക തീവണ്ടി
തിരുവനന്തപുരം സെൻട്രലില്‍നിന്ന് ഓഗസ്റ്റ് 27, സെപ്റ്റംബർ മൂന്ന് തീയതികളില്‍ വൈകീട്ട് 3.25-ന് പുറപ്പെടുന്ന തീവണ്ടി (06115) പിറ്റേന്ന് രാവിലെ 3.55-ന് വേളാങ്കണ്ണിയിലെത്തും. വേളാങ്കണ്ണിയില്‍നിന്ന് ഓഗസ്റ്റ് 28, സെപ്റ്റംബർ നാല് തീയതികളില്‍ രാത്രി 7.30-ന് തിരിക്കുന്ന പ്രത്യേക തീവണ്ടി (06116) പിറ്റേന്ന് രാവിലെ 6.55-ന് തിരുവനന്തപുരത്ത് എത്തും.
നാഗർകോവില്‍, തിരുനെല്‍വേലി വഴിയുള്ള തീവണ്ടിയില്‍ രണ്ട് സെക്കൻഡ് എസി കോച്ചുകള്‍, രണ്ട് തേർഡ് എസി കോച്ചുകള്‍, മൂന്ന് ഇക്കോണമി ത്രി ടിയർ കോച്ചുകള്‍, ആറ്് സ്ലീപ്പർ ക്ലാസ് കോച്ചുകള്‍, നാല് ജനറല്‍ കോച്ചുകള്‍ എന്നിവയുണ്ടാകും. പ്രത്യേക തീവണ്ടികളിലേക്കുള്ള റിസർവേഷൻ ചൊവ്വാഴ്ച രാവിലെ എട്ടിനാരംഭിക്കും. വേളാങ്കണി പെരുന്നാള്‍ ആഘോഷം ഈ മാസം 29-ന് ആരംഭിച്ച്‌ സെപ്റ്റംബർ എട്ടിന് അവസാനിക്കും.
