കോഴിക്കോട് കൂടരഞ്ഞി പെരുമ്പുളയിലെ കിണറ്റില്‍ വീണ പുലിയെ മണിക്കൂറുകള്‍ നീണ്ട ദൗത്യത്തിനൊടുവില്‍ പുറത്തെത്തിച്ചു. പുലര്‍ച്ചെ ഒരു മണിയോടെ കിണറ്റില്‍ സ്ഥാപിച്ച കൂട്ടില്‍ പുലി കുടുങ്ങുകയായിരുന്നു. പുറത്തെത്തിച്ച പുലി ആരോഗ്യവാനാണെന്ന് വനംവകുപ്പ് അറിയിച്ചു.
താമരശ്ശേരി റേഞ്ച് ഓഫിസിലേക്ക് പുലിയെ മാറ്റി. കൂട്ടിലുള്ള പുലിയെ കൂടുതല്‍ പരിശോധനയ്ക്കുശേഷം ഉള്‍ക്കാട്ടില്‍ തുറന്നുവിടുന്നതിലടക്കം തീരുമാനമെടുക്കും. പുലിയെ പിടിക്കാനായി കിണറ്റിനുള്ളില്‍ ഇന്നലെയാണ് കൂട് സ്ഥാപിച്ചിരുന്നത്. കിണറ്റിനുള്ളില്‍ ഇറക്കാവുന്നതരത്തിലുള്ള ചെറിയ കൂടാണ് സ്ഥാപിച്ചത്. ചൊവ്വാഴ്ചയാണ് കൂടരഞ്ഞി പെരുമ്പൂള കുര്യന്റെ കൃഷിയിടത്തിലെ പതിനഞ്ച് മീറ്ററോളം താഴ്ചയുള്ള കിണറ്റില്‍ പുലി വീണത്.
