ട്രാവലർ സ്‌കൂട്ടറിലിടിച്ച് അപകടം; യുവതിക്ക് ദാരുണാന്ത്യം

കൊച്ചി: ആലുവ-മൂന്നാർ റോഡിൽ ട്രാവലർ സ്‌കൂട്ടറിലിടിച്ചുണ്ടായ അപകടത്തിൽ യുവതി മരിച്ചു. സ്‌കൂട്ടർ യാത്രികയായ വരാപ്പുഴ ഒളനാട് സ്വദേശിനി സുനിത വില്യമാ(42)ണ് മരിച്ചത്.

സ്‌കൂട്ടർ ഓടിച്ചിരുന്ന ഒളനാട് സ്വദേശി പി.എസ്. ലൈജു(41)വിനെ ഗുരുതരമായ പരിക്കുകളോടെ ചുണങ്ങംവേലിയിലെ സ്വകാര്യ ആശുപത്രിയിൽ പ്രവേശിപ്പിച്ചു. 

കോളനിപ്പടിക്ക് സമീപം ബുധനാഴ്ച രാത്രി 8.45നാണ് സംഭവം. ആലുവ ഭാഗത്തേക്ക് പോയ സ്വകാര്യ ബസിനെ സ്‌കൂട്ടർ മറികടക്കുന്നതിനിടെ എതിർദിശയിൽ നിന്നു വന്ന ട്രാവലർ ഇടിക്കുകയായിരുന്നു.ഇടിച്ച ശേഷം 30 മീറ്ററോളം മുന്നോട്ട് നീങ്ങിയ ശേഷമാണ് ട്രാവലർ നിന്നത്.