അധിക താരിഫ് ചുമത്തുന്നതില്‍ നിന്ന് കാനഡയെയും മെക്‌സിക്കോയെയും ഒഴിവാക്കി ഡോണള്‍ഡ് ട്രംപ്. ഇരുരാജ്യങ്ങളുമായി വ്യാപാര വിഷയത്തില്‍ കടുത്ത അതൃപ്തി നിലനില്‍ക്കെയാണ് അധിക താരിഫില്‍ നിന്നൊഴിവാക്കിയത്.
കാനഡയുമായി പലപ്പോഴും ട്രംപ് നേരിട്ട് ഏറ്റുമുട്ടി. ഇന്റര്‍നാഷണല്‍ എമര്‍ജന്‍സി ഇക്കണോമിക് പവേഴ്‌സ് ആക്ട് (IEEPA) പ്രകാരം നിലവിലുള്ള കരാറുകള്‍ കാരണമാണ് കാനഡയെയും മെക്‌സിക്കോയെയും അധിക താരിഫുകളില്‍ നിന്ന് ഒഴിവാക്കിയതെന്നാണ് വൈറ്റ് ഹൗസിന്റെ വിശദീകരണം. ഫെന്റനൈല്‍, കുടിയേറ്റം എന്നിവയുമായി ബന്ധപ്പെട്ട അന്താരാഷ്ട്ര അടിയന്തര സാമ്പത്തിക അധികാര നിയമ (IEEPA) പ്രകാരം നിലവിലുള്ള ഓര്‍ഡറുകള്‍ കാരണം കാനഡയ്ക്കും മെക്‌സിക്കോയ്ക്കും പുതിയ താരിഫ് ബാധകമാകില്ലെന്ന് വൈറ്റ് ഹൗസ് സ്ഥിരീകരിച്ചു.
പുതിയ ഘടന പ്രകാരം, കാനഡയില്‍ നിന്നും മെക്‌സിക്കോയില്‍ നിന്നുമുള്ള യുഎസ്എംസിഎ അനുസരിച്ചുള്ള ഇറക്കുമതി തീരുവ രഹിതമായി തുടരും, അതേസമയം യുഎസ്എംസിഎയില്‍പ്പെടാത്ത ഇറക്കുമതികള്‍ക്ക് 25% താരിഫ് നേരിടേണ്ടിവരും. ഊര്‍ജ്ജ, പൊട്ടാഷ് ഇറക്കുമതികള്‍ക്ക് 10% നികുതി ചുമത്തുമെന്നും ഐഇഇപിഎ ഓര്‍ഡറുകള്‍ പിന്‍വലിച്ചാല്‍, കരാറിന് പുറത്തുള്ള ഇറക്കുമതിക്ക് 12% താരിഫ് മാത്രമേ ബാധകമാകൂവെന്നും വൈറ്റ് ഹൗസ് വൃത്തങ്ങള്‍ അറിയിച്ചു.
