കോർബ : പ്രണയം തെളിയിക്കാനായി വിഷം കഴിച്ച ഇരുപതുകാരന് ദാരുണാന്ത്യം. ചത്തീസ്‌ഗഡിലെ കോർബ ജില്ലയിലാണ് സംഭവം നടന്നത്.സോനാരി സ്വദേശിയായ പെണ്‍കുട്ടിയുമായി യുവാവ് പ്രണയത്തിലായിരുന്നു.
ഇവരുടെ ബന്ധത്തെക്കുറിച്ച്‌ അറിഞ്ഞ പെണ്‍കുട്ടിയുടെ ബന്ധുക്കള്‍ കൃഷ്‌ണകുമാറിനോട് വീട്ടിലേയ്ക്ക് വരാൻ ആവശ്യപ്പെട്ടു. ഇതുപ്രകാരം സെപ്‌തംബർ 25ന് യുവാവ് പെണ്‍കുട്ടിയുടെ വീട്ടിലെത്തി.
പെണ്‍കുട്ടിയോടുള്ള പ്രണയം യഥാർത്ഥമാണെങ്കില്‍ വിഷം കഴിച്ച്‌ തെളിയിക്കാൻ ബന്ധുക്കള്‍ ആവശ്യപ്പെടുകയായിരുന്നു. ഇതനുസരിച്ച്‌ വിഷം കഴിച്ച യുവാവ് വിവരം സ്വന്തം വീട്ടുകാരെ അറിയിക്കുകയും ചെയ്തു.
പിന്നാലെ ഗുരുതരാവസ്ഥയിലായ യുവാവ് ചികിത്സയില്‍ കഴിയവേയാണ് മരിച്ചത്. ബന്ധുക്കളുടെ പരാതിയില്‍ സംഭവത്തില്‍ കേസെടുത്ത പൊലീസ് അന്വേഷണം ആരംഭിച്ചു.
