സൗദി അറേബ്യയിലെ ബീഷയില്‍ കാസര്‍ഗോഡ് സ്വദേശി വെടിയേറ്റ് കൊല്ലപ്പെട്ട സംഭവത്തില്‍ രണ്ടുപേര്‍ പിടിയിലായതായി സൂചന. റിയാദില്‍ വച്ചാണ് ഇവരെ പിടികൂടിയത് എന്നാണ് വിവരം. കൗമാരക്കാരായ രണ്ടുപേരാണ് പ്രതികളെന്നും വിവരമുണ്ട്. ഇതു സംബന്ധിച്ച് കൂടുതല്‍ വിവരങ്ങള്‍ അറിവായിട്ടില്ല.
കാസര്‍ഗോഡ് ബദിയ ബന്തടുക്ക സ്വദേശി എ എം ബഷീര്‍ (41) കഴിഞ്ഞ ദിവസം രാത്രിയാണ് വെടിയേറ്റ് കൊല്ലപ്പെട്ടത്. വാഹനം കഴുകുന്നതിനിടെ മറ്റൊരു വാഹനത്തിലെത്തിയ ആക്രമി സംഘം വെടിവച്ചു കൊല്ലുകയായിരുന്നു. അടുത്തുണ്ടായിരുന്നവര്‍ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
