മുംബൈ: മുംബൈയിലെ നാഗ്പാഡയില്‍ നിര്‍മ്മാണത്തിലിരിക്കുന്ന കെട്ടിടത്തിലെ വാട്ടര്‍ ടാങ്ക് വൃത്തിയാക്കുന്നതിനിടെ നാല് തൊഴിലാളികള്‍ ശ്വാസംമുട്ടി മരിച്ചു. മരിച്ചവരില്‍ 4 പേരും കരാര്‍ തൊഴിലാളികളാണ്.
ഹസിപാല്‍ ഷെയ്ഖ് (19), രാജ ഷെയ്ഖ് (20), ജിയുള്ള ഷെയ്ഖ് (36), ഇമാണ്ടു ഷെയ്ഖ് (38) എന്നിവരാണ് അപകടത്തില്‍ മരിച്ചത്. ഇന്ന് ഉച്ചയ്ക്ക് 12.29 ന് മുംബൈയിലെ നാഗ്പാഡയിലെ മിന്റ് റോഡിലുള്ള ഗുഡ് ലക്ക് മോട്ടോര്‍ ട്രെയിനിംഗ് സ്‌കൂളിന് സമീപമുള്ള കെട്ടിടത്തിലാണ് തൊഴിലാളികള്‍ ടാങ്ക് വൃത്തിയാക്കാന്‍ എത്തിയത്.
ആദ്യം 2 പേരായിരുന്നു ടാങ്ക് വൃത്തിയാക്കാന്‍ ഇറങ്ങിയിരുന്നത്. എന്നാല്‍ അല്‍പസമയം കഴിഞ്ഞ് 2 പേരെയും കാണാതായപ്പോള്‍ കൂടെയുണ്ടായിരുന്നവര്‍ കൂടി ഇവരെ തിരക്കി ടാങ്കിലേക്ക് ഇറങ്ങുകയും ശ്വാസംമുട്ടുകയുമായിരുന്നു. 5 തൊഴിലാളികളാണ് ടാങ്ക് വൃത്തിയാക്കാന്‍ ഇറങ്ങിയിരുന്നത്. ആശുപത്രിയിലേക്ക് എത്തിക്കും വഴിയാണ് 4 തൊഴിലാളികളുടെ മരണം സ്ഥിരീകരിച്ചത്. കൂടെ ഉണ്ടായിരുന്ന മറ്റൊരാളെ ജെ ജെ ആശുപത്രിയില്‍ ചികിത്സയ്ക്കായി പ്രവേശിപ്പിച്ചിരിക്കുകയാണ്.