ചെന്നൈ: തമിഴ്‌നാട്ടിൽ മാമല്ലപുരത്ത് വിവാഹസത്കാരച്ചടങ്ങിൽ നൃത്തംചെയ്യുന്നതിനിടെ യുവതി കുഴഞ്ഞുവീണ് മരിച്ചു. കാഞ്ചീപുരം സ്വദേശിയായ ജീവയാണ് മരിച്ചത്. സുഹൃത്തിന്റെ മകന്റെ വിവാഹച്ചടങ്ങിൽ പങ്കെടുക്കാൻ ഭർത്താവ് ജ്ഞാനത്തിനൊപ്പം എത്തിയതായിരുന്നു ജീവ. ചൊവ്വാഴ്ച രാത്രിയാണ് സംഭവം.
പ്രമുഖ തമിഴ് പിന്നണിഗായകനായ വേൽമുരുഗന്റെ സംഗീതപരിപാടി, വിവാഹസത്കാരത്തിനോട് അനുബന്ധിച്ച് സംഘടിപ്പിച്ചിരുന്നു. വേദിയിൽ തനിക്കൊപ്പം നൃത്തംചെയ്യാൻ കാണികളെയും വേൽമുരുകൻ ക്ഷണിച്ചതോടെ അവിടേക്ക് പോയവരിൽ ജീവയുമുണ്ടായിരുന്നു.
തുടർന്ന് ഇവർ മറ്റുള്ളവർക്കൊപ്പം നൃത്തം ചെയ്യുന്നതിനിടെ പെട്ടെന്ന് കുഴഞ്ഞുവീഴുകയായിരുന്നു. കുഴഞ്ഞുവീണ ജീവയ്ക്ക് ഉടൻ പ്രാഥമിക ശുശ്രൂഷ നൽകുകയും പിന്നീട് സമീപത്തെ ആശുപത്രിയിലെത്തിച്ചെങ്കിലും രക്ഷിക്കാനായില്ല. യുവതി നൃത്തം ചെയ്യുന്നതിന്റെയും കുഴഞ്ഞുവീഴുന്നതിന്റെയും ദൃശ്യങ്ങൾ സമൂഹ മാധ്യമങ്ങളിൽ പ്രചരിക്കുന്നുണ്ട്.