ഈ വര്‍ഷത്തെ ലോക സന്തോഷ സൂചികയില്‍ മികച്ച സ്ഥാനം നേടി കുവൈത്ത്. ആഗോളതലത്തില്‍ 30-ാം സ്ഥാനവും ഗള്‍ഫ് മേഖലയില്‍ രണ്ടാം സ്ഥാനവും കുവൈത്തിനുള്ളത്. ഓക്‌സ്‌ഫോര്‍ഡ് യൂണിവേഴ്‌സിറ്റിയിലെ സെന്റര്‍ ഫോര്‍ വെല്‍-ബീയിംഗ്, ഗാലപ്പ്, യുണൈറ്റഡ് നേഷന്‍സ് സസ്‌റ്റൈനബിള്‍ ഡെവലപ്മെന്റ് സൊല്യൂഷന്‍സ് നെറ്റ്വര്‍ക്ക് എന്നിവ സംയുക്തമായാണ് പട്ടിക പ്രസിദ്ധീകരിച്ചത്. താമസക്കാര്‍ക്കിടയിലെ ഉയര്‍ന്ന ജീവിത സംതൃപ്തിയാണ് ഇത് പ്രതിഫലിപ്പിക്കുന്നത്. 2022 മുതല്‍ 2024 വരെയുള്ള കാലയളവിലെ വിവരങ്ങള്‍ അടിസ്ഥാനമാക്കി, വ്യക്തികളുടെ ജീവിതത്തെക്കുറിച്ചുള്ള സ്വയം വിലയിരുത്തലുകള്‍ കണക്കിലെടുത്താണ് ഈ റിപ്പോര്‍ട്ട് തയ്യാറാക്കിയിരിക്കുന്നത്.
സാമൂഹിക ഐക്യം, കാരുണ്യ പ്രവര്‍ത്തനങ്ങള്‍, പൊതു വിശ്വാസം എന്നിവയുള്‍പ്പെടെ നിരവധി പ്രധാന മേഖലകളില്‍ കുവൈത്ത് കൈവരിച്ച പുരോഗതി റിപ്പോര്‍ട്ട് എടുത്തു കാണിക്കുന്നു. ജീവിത സംതൃപ്തി അളക്കുന്ന പ്രധാന സൂചികയായ കാന്‍ട്രില്‍ ലാഡറില്‍ കുവൈത്ത് ആഗോളതലത്തില്‍ 30-ാം സ്ഥാനത്തെത്തി. ഉപസൂചകകളിലും രാജ്യം മികച്ച പ്രകടനം കാഴ്ചവെച്ചു. ഗ്ലോബല്‍ ഡൊണേഷന്‍ ഇന്‍ഡക്‌സില്‍ 33-ാം സ്ഥാനവും, സന്നദ്ധപ്രവര്‍ത്തനത്തില്‍ 46-ാം സ്ഥാനവും, അപരിചിതരെ സഹായിക്കുന്നതില്‍ 27-ാം സ്ഥാനവും കുവൈത്ത് നേടി. ഗള്‍ഫ് മേഖലയില്‍ യുണൈറ്റഡ് അറബ് എമിറേറ്റ്‌സ് (യുഎഇ) ആണ് ഒന്നാം സ്ഥാനത്ത്. ആഗോള സന്തോഷ സൂചികയില്‍ 21-ാം സ്ഥാനത്താണ് യുഎഇ.