റെയില്‍വേ ട്രാക്കില്‍ ആത്മഹത്യ ചെയ്യാന്‍ എത്തിയ യുവാവിനെ രക്ഷപ്പെടുത്തി കുറ്റിപ്പുറം പൊലീസ്. പ്രണയ നൈരാശ്യത്താല്‍ ഫേസ്ബുക്കില്‍ ലൈവ് നല്‍കിയശേഷം കുറ്റിപ്പുറം റെയില്‍വേ ട്രാക്കില്‍ ആത്മഹത്യ ചെയ്യാനായിരുന്നു യുവാവിന്റെ ശ്രമം. പൊന്നാനി സ്റ്റേഷന്‍ പരിധിയിലുള്ള കാലടി സ്വദേശിയായ യുവാവിനെയാണ് കുറ്റിപ്പുറം എസ് ഐ ബാബുജിയുടെ നേതൃത്വത്തിലുള്ള പൊലീസ് സംഘം ജീവിതത്തിലേക്ക് തിരിച്ചുകൊണ്ടുവന്നത്
യുവാവുമായി പ്രണയത്തിലായിരുന്ന യുവതി ബന്ധത്തില്‍ നിന്നും പിന്മാറിയതിനെ തുടര്‍ന്നാണ് ഫേസ്ബുക്കില്‍ ലൈവ് ഇട്ട ശേഷം കുറ്റിപ്പുറത്തെ റെയില്‍വേ ട്രാക്കിലേക്ക് ആത്മഹത്യ ചെയ്യാനെത്തിയത്. പൊന്നാനി പൊലീസ് നല്‍കിയ വിവരത്തിന്റെ അടിസ്ഥാനത്തില്‍ സൈബര്‍ സെല്ലിന്റെ സഹായത്തോടെ യുവാവിന്റെ ലൊക്കേഷന്‍ കണ്ടെത്തി പൊലീസ് സ്ഥലത്ത് എത്തുകയായിരുന്നു.
എന്നാല്‍ പൊലീസ് അവിടെ എത്തുമ്പോഴേക്കും യുവാവ് റെയില്‍വേ ട്രാക്കിന്റെ മറ്റൊരു സ്ഥലത്തേക്ക് മാറിയിരുന്നു. ഇതിനെ തുടര്‍ന്ന് ഫോണ്‍ നമ്പറിലേക്ക് എസ്‌ഐ വിളിക്കുകയും യുവാവിനോട് സംസാരിക്കുകയും ചെയ്തു. ശേഷം യുവാവിനെ കണ്ടെത്തുകയായിരുന്നു. ഏറെനേരം നീണ്ട പൊലീസുകാരുടെ കൗണ്‍സിലിങ്ങിലാണ് യുവാവ് ആത്മഹത്യയില്‍ നിന്നും പിന്മാറിയത്.