കുവൈത്തില്‍ നിന്ന് അവധിക്ക് നാട്ടിലെത്തിയിട്ട് രണ്ട് ദിവസം. കാര്‍ കനാലിലേക്ക് വീണ് പ്രവാസിക്ക് ദാരുണാന്ത്യം. കാര്‍ നിയന്ത്രണം വിട്ട് കനാലിലേക്ക് മറിഞ്ഞുണ്ടായ അപകടത്തിലാണ് 48കാരനായ പ്രവാസി മരിച്ചത്. ഇരണിയലിനു സമീപം കട്ടിമാങ്കോട് സ്വദേശി ക്രിസ്റ്റഫര്‍ ആണ് മരിച്ചതെന്നാണ് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നത്.
ബന്ധുവിന്റെ വീട്ടില്‍ നടക്കുന്ന ഒരു ചടങ്ങില്‍ പങ്കെടുക്കാന്‍ നാഗര്‍കോവിലിന് സമീപത്തെ തോവാളയ്ക്ക് സമീപത്തെ ഭൂതപാണ്ടിയിലെത്തിയത്. സ്വന്തം കാറിലാണ് ക്രിസ്റ്റഫര്‍ ഇവിടെയെത്തിയത്. ചടങ്ങ് കഴിഞ്ഞ് മടക്ക യാത്രയില്‍ നാവല്‍ക്കാടിന് സമീപത്ത് വച്ച് കാര്‍ അപകടത്തില്‍പ്പെടുകയായിരുന്നു. നിയന്ത്രണം നഷ്ടമായ കാര്‍ റോഡിന് സമീപത്തെ അരശിയര്‍ കനാലിലേക്ക് മറിയുകയായിരുന്നു.
ക്രിസ്റ്റഫര്‍ കാറിന് പുറത്തേക്ക് എത്താനാകാതെ വാഹനത്തില്‍ കുടുങ്ങുകയായിരുന്നു. അപകടം കണ്ടെത്തിയ പരിസരവാസികള്‍ ക്രിസ്റ്റഫറിനെ പുറത്ത് എത്തിച്ചെങ്കിലും ജീവന്‍ രക്ഷിക്കാനായില്ല. ക്രിസ്റ്റഫര്‍ സഞ്ചരിച്ചിരുന്ന കിയ കാര്‍ അമിത വേഗതയിലായിരുന്നുവെന്നാണ് ദൃക്‌സാക്ഷികള്‍ വിശദമാക്കുന്നത്. ക്രിസ്റ്റഫറിന്റെ ഭാര്യ വിദേശത്ത് നഴ്‌സാണ്. മൂന്ന് മക്കളാണ് ദമ്പതികള്‍ക്കുള്ളത്. ഇവരുടെ മക്കള്‍ ക്രിസ്റ്റഫറിന്റെ ഭാര്യ ജ്ഞാനഷീലയുടെ അമ്മയോടൊപ്പമാണ് താമസിക്കുന്നത്.
