കാലത്തിനനുസരിച്ച് വിവാഹം മാറിയിട്ടുണ്ട്, പക്ഷേ സമൂഹത്തിന്റെ പ്രതീക്ഷകള്‍ മാറിയിട്ടില്ല. നൂറ്റാണ്ടുകള്‍ക്ക് മുമ്പ് എഴുതപ്പെട്ട ചാണക്യനീതി, ഇന്നത്തെ സ്ത്രീകള്‍ നേരിടുന്ന പല വെല്ലുവിളികളെയും പ്രതിഫലിപ്പിക്കുന്നുണ്ട് എന്നത് അതിശയകരമാണ്. വൈകാരിക അതിരുകള്‍ മുതല്‍ സ്വാതന്ത്ര്യവും ബഹുമാനവും വരെ, വിവാഹത്തിന് മുമ്പ് എല്ലാ ആധുനിക സ്ത്രീകളും ചിന്തിക്കേണ്ട അഞ്ച് കാലാതീതമായ നിയമങ്ങള്‍ ചാണക്യന്‍ കുറിച്ചിട്ടിട്ടുണ്ട്.
ചാണക്യന്‍ ഇന്ത്യയിലെ ഏറ്റവും മൂര്‍ച്ചയുള്ള രാഷ്ട്രീയ തന്ത്രജ്ഞനായിരുന്നു. ചാണക്യനീതി എന്ന ഗ്രന്ഥത്തില്‍ ജീവിതം, ഭരണം, ബന്ധങ്ങള്‍ എന്നിവയെക്കുറിച്ചുള്ള തന്ത്രങ്ങള്‍ രേഖപ്പെടുത്തിയിട്ടുണ്ട്. പുരാതന കാലത്ത് എഴുതപ്പെട്ടെങ്കിലും, അദ്ദേഹത്തിന്റെ ജ്ഞാനം ഇന്നത്തെ ലോകത്തിന് ഒരു കണ്ണാടി പോലെ പ്രവര്‍ത്തിക്കുന്നു. ഇന്ന്, സ്ത്രീകള്‍ വെറും പരിചരണക്കാരുടെ റോളില്‍ മാത്രമല്ല, അവര്‍ പ്രൊഫഷണലുകളും, ചിന്തകരും, സര്‍ഗാത്മകരും, തുല്യ പങ്കാളികളുമാണ്. എന്നിട്ടും, വിവാഹത്തിന്റെ വൈകാരികവും സാമൂഹികവും വ്യക്തിപരവുമായ വശങ്ങള്‍ ഇപ്പോഴും പ്രതീക്ഷകളും അന്ധമായ കാഴ്ചപ്പാടുകളും കൊണ്ട് നിറഞ്ഞിരിക്കുന്നു.
1. പങ്കാളിയുടെ യഥാര്‍ത്ഥ സ്വഭാവം മനസ്സിലാക്കുക
വിവാഹത്തിന് മുമ്പ് പലപ്പോഴും സ്ത്രീകളോട് ഒരു പുരുഷന്റെ ജോലി, കുടുംബ പശ്ചാത്തലം, വരുമാനം എന്നിവ പരിശോധിക്കാന്‍ പറയാറുണ്ട്. എന്നാല്‍, ചാണക്യന്‍ ശ്രദ്ധ കേന്ദ്രീകരിക്കുന്നത് പുരുഷന്റെ പെരുമാറ്റത്തിലാണ്. സ്ത്രീകളോട്, പ്രത്യേകിച്ച് അമ്മ, സഹോദരിമാര്‍, അല്ലെങ്കില്‍ അപരിചിതരോട് എങ്ങനെ പെരുമാറുന്നു? അവന്‍ സ്വകാര്യ ഇടത്തിലും പൊതുസ്ഥലത്തും ബഹുമാനം കാണിക്കുന്നുണ്ടോ? തുല്യതയില്‍ വിശ്വസിക്കുന്നുണ്ടോ, അതോ അത് വെറും പ്രകടനം മാത്രമാണോ? ഡേറ്റിംഗ് ആപ്പുകളുടെയും ഇന്‍സ്റ്റാഗ്രാം പ്രൊഫൈലുകളുടെയും ഈ യുഗത്തില്‍, കെട്ടിച്ചമച്ച വ്യക്തിത്വങ്ങളില്‍ വീഴാന്‍ എളുപ്പമാണ്. യഥാര്‍ത്ഥ സ്വഭാവം സമ്മര്‍ദ്ദപൂര്‍ണമായ സാഹചര്യങ്ങളില്‍ വെളിവാകുമെന്ന് ചാണക്യന്‍ ഓര്‍മ്മിപ്പിക്കുന്നു.
2. വിവാഹത്തിന് ശേഷം ബുദ്ധി ഉപേക്ഷിക്കരുത്
ആധുനിക സ്ത്രീകള്‍ക്ക് വിദ്യാഭ്യാസം നേടാനും കരിയര്‍ കെട്ടിപ്പടുക്കാനും സ്വന്തം ശബ്ദം ഉയര്‍ത്താനും കഴിവും വിദ്യാഭ്യാസവുമുണ്ട്. പക്ഷേ, വിവാഹത്തിന് ശേഷം പലപ്പോഴും സമൂഹം അവരുടെ ശബ്ദത്തിനും കഴിവിനും ഒരു ''പോസ്'' ബട്ടണ്‍ അമര്‍ത്തുന്നു. ചാണക്യന്റെ അഭിപ്രായത്തില്‍, ജ്ഞാനമുള്ള സ്ത്രീ വീടിനെ ശക്തിപ്പെടുത്തുന്നത് അനുസരണയിലൂടെയല്ല, ബുദ്ധിപരമായ ഉപദേശത്തിലൂടെയാണ്. ധനം കൈകാര്യം ചെയ്യാനും, വ്യക്തമായി പ്രവര്‍ത്തിക്കാനും, തീരുമാനങ്ങള്‍ എടുക്കാനും കഴിവുള്ള സ്ത്രീകളെ പുരുഷന്‍ വിലമതിച്ചിരുന്നു. വിവാഹശേഷം സ്വയം ഒതുങ്ങി നിഴലായി മാറരുതെന്നാണ് ചാണക്യന്റെ ഉപദേശം.
3. വിവാഹത്തിലെ അധികാര സന്തുലനം അവഗണിക്കരുത്
ചാണക്യന്‍ അസമത്വമുള്ള വിവാഹങ്ങളെക്കുറിച്ച് മുന്നറിയിപ്പ് നല്‍കുന്നു. സ്ത്രീകള്‍ പുരുഷന്മാരെ ആധിപത്യം ചെയ്യണമെന്നല്ല, പരസ്പര ബഹുമാനം അനിവാര്യമാണെന്നാണ് അദ്ദേഹം പറയുന്നത്. സ്ത്രീയുടെ സ്വപ്‌നങ്ങളും, വാക്കുകളും, പ്രവൃത്തികളും പങ്കാളി വിലമതിക്കുന്നില്ലെങ്കില്‍, ബന്ധം ശൂന്യമാകും. വിവാഹം എത്ര ആഡംബരമായാലും, വീട് എത്ര വലുതായാലും അതില്‍ മാറ്റമില്ല. സാമൂഹിക അസമത്വങ്ങള്‍ ഒരു ബന്ധത്തെ ഇല്ലാതാക്കും. അതിനാല്‍, തുല്യ പങ്കാളിയായി കാണുന്ന ഒരു പങ്കാളിയെ തിരഞ്ഞെടുക്കാനാണ് ചാണക്യന്‍ ഉപദേശിക്കുന്നത്.
4. സാമൂഹിക അംഗീകാരത്തിനായി വ്യക്തിത്വം ത്യജിക്കരുത്
വിവാഹത്തിന് ശേഷം സ്ത്രീകളുടെ സ്വാതന്ത്ര്യം നിഷേധിക്കുന്നുവെന്ന് ചാണക്യന്‍ മുന്നറിയിപ്പ് നല്‍കുന്നു. 2025-ലും, പല സ്ത്രീകളും പേര്, കരിയര്‍, നാട്, അല്ലെങ്കില്‍ വിശ്വാസങ്ങള്‍ എന്നിവ പാരമ്പര്യത്തിന്റെ പേര് പറഞ്ഞ് ത്യജിക്കാന്‍ നിര്‍ബന്ധിതരാകുന്നു. എന്നാല്‍, വ്യക്തിത്വത്തെ മായ്ച്ചുകളയുന്ന പാരമ്പര്യങ്ങള്‍ പവിത്രമല്ല. ഒരു സ്ത്രീ തന്റെ വ്യക്തിത്വത്തില്‍ ഉറച്ചുനില്‍ക്കണം. സ്വാതന്ത്ര്യം എന്നത് വിപ്ലവമല്ല, തിരഞ്ഞെടുക്കാനുള്ള അവകാശമാണ്. ഇഷ്ടമുള്ള വസ്ത്രം ധരിക്കുക, ഇഷ്ടമുള്ള ജോലി ചെയ്യുക, മൂല്യവ്യവസ്ഥയില്‍ വിശ്വസിക്കുക.
5. ശാന്തി നല്‍കുന്ന ഒരു വീട് തിരഞ്ഞെടുക്കുക
ചാണക്യന്റെ ഏറ്റവും മൃദുവും എന്നാല്‍ ശക്തവുമായ ഉപദേശം ഒരു വീടിന്റെ ശാന്തി ആഡംബരമോ ആചാരങ്ങളോ അല്ല എന്ന് ഊന്നിപ്പറയുന്നു. ശാന്തി വിശ്വാസത്തില്‍നിന്നും വൈകാരിക സുരക്ഷിതത്വത്തില്‍നിന്നും പങ്കുവെക്കപ്പെടുന്ന മൂല്യങ്ങളില്‍നിന്നുമാണ് വരുന്നത്. വിവാഹത്തിന് മുമ്പ്, സ്വയം ചോദിക്കുക ഇവിടെ ഞാന്‍ വൈകാരികമായി സത്യസന്ധയാകുമോ? എന്റെ താഴ്ചകളില്‍ എനിക്ക് പിന്തുണ ലഭിക്കുമോ? ഇവിടെ ഞാന്‍ കരയാനും ചിരിക്കാനും വളരാനും പരാജയപ്പെടാനും വിധിക്കപ്പെടാതെ കഴിയുമോ? മാനസികാരോഗ്യം നിരന്തരം ഭീഷണിയിലാണെങ്കില്‍, അത് ഒരു വീടല്ല, ഒരു കെണിയാണ്. ഒരു ഏകാധിപതിയെ അല്ല, ഒരു പങ്കാളിയെ തിരഞ്ഞെടുക്കാനാണ് ചാണക്യന്റെ ഉപദേശം.
വിവാഹം ഒരു മത്സരമോ രക്ഷാദൗത്യമോ അല്ല. അത് സമൂഹത്തെ തൃപ്തിപ്പെടുത്തലിനെക്കുറിച്ചോ അല്ല. ഒരു ബോധപൂര്‍വമായ തിരഞ്ഞെടുപ്പാണ്, അത് സ്ത്രീയെ ശക്തിപ്പെടുത്തണം. ചാണക്യന്‍ സ്ത്രീകളെ എങ്ങനെ ഒരു മികച്ച ഭാര്യയാകണമെന്ന് പഠിപ്പിക്കുന്നില്ല. അവരെ ബോധവതികളും, ചിന്താശീലരും, വൈകാരികമായി ബുദ്ധിമതികളുമായ വ്യക്തികളാകാന്‍ ഉപദേശിക്കുകയാണ്.
