ഇടുക്കി : സ്ഥലമാറ്റം ലഭിച്ചതിനെ തുടര്‍ന്ന് ഇടുക്കി ജില്ലാ പൊലീസ് മേധാവി ടി കെ വിഷ്ണുപ്രദീപ് സ്ഥാനമൊഴിഞ്ഞു. ജില്ലാ പൊലീസ് ആസ്ഥാനത്ത് നടന്ന ലളിതമായ പരിപാടിയില്‍ സഹപ്രവര്‍ത്തകര്‍ അദ്ദേഹത്തിന് വികാരനിര്‍ഭരമായ യാത്രയയപ്പ് നല്‍കി. 2023 നവംബര്‍ 14 ന് ജില്ലാ പൊലീസ് മേധാവിയായി സ്ഥാനം ഏറ്റെടുത്തതു മുതല്‍ പ്രവര്‍ത്തനമണ്ഡലങ്ങളില്‍ കൃത്യനിഷ്ഠതയോടെയും കണിശതയോടെയും പ്രവര്‍ത്തിക്കാന്‍ കഴിഞ്ഞുവെന്ന് അദ്ദേഹം പറഞ്ഞു.
2023-2025 കാലയളവില്‍ ശ്രദ്ധേയമായ നേട്ടങ്ങളാണ് ജില്ലയില്‍ പൊലീസ് കൈവരിച്ചത്. ശബരിമല മണ്ഡല -മകരവിളക്ക് ഉത്സവങ്ങള്‍, മംഗളാദേവി ചിത്രപൗര്‍ണമി ഉത്സവം, തുടങ്ങിയവ വിജയകരമായി നടത്താന്‍ പൊലീസ് സേനയ്ക്ക് കഴിഞ്ഞു. തീര്‍ഥാടകരുടെ സുരക്ഷയും സൗകര്യങ്ങളും ഉറപ്പാക്കുന്നതില്‍ വിവിധ വകുപ്പുകളുമായി ചേര്‍ന്ന് പ്രവര്‍ത്തിച്ചു.
2024 ലെ ലോക്‌സഭാ തിരഞ്ഞെടുപ്പ് ജില്ലയില്‍ സുരക്ഷിത അന്തരീക്ഷത്തില്‍ കൃത്യതയോടെ നടത്താന്‍ പൊലീസ് സേനയ്ക്ക് കഴിഞ്ഞു. തിരഞ്ഞെടുപ്പ് പ്രചരണങ്ങളുടേയും വോട്ടെടുപ്പ് ദിവസങ്ങളിലെയും സുരക്ഷിതത്വം ഉറപ്പാക്കുന്നതില്‍ നിര്‍ണായക പങ്ക് വഹിച്ചു. നവകേരള സദസ്സ്, മന്ത്രിസഭ വാര്‍ഷികം തുടങ്ങിയ പൊതു പരിപാടികള്‍ വിജയകരമായി പൂര്‍ത്തിയാക്കാനായി. കൂടാതെ ജില്ലയില്‍ നടന്ന വിവിധ വി.ഐ.പി. സന്ദര്‍ശനങ്ങള്‍ക്ക് സുരക്ഷാ ക്രമീകരണങ്ങള്‍ കാര്യക്ഷമമായി നടപ്പാക്കുകയും ചെയ്തു.
മയക്കുമരുന്ന് വിരുദ്ധ പ്രവര്‍ത്തനങ്ങളില്‍ പൊലീസ് സേന ശക്തമായ ഇടപെടലുകളാണ് നടത്തിയത്. എന്‍.ഡി.പി.എസ്. നിയമപ്രകാരം മയക്കുമരുന്ന് കേസുകളുടെ കണ്ടെത്തലും കര്‍ശന നടപടികളും മുന്‍കാലങ്ങളെക്കാളും വര്‍ധിച്ചു.
പൊലീസ് ഉദ്യോഗസ്ഥരുടെ ക്ഷേമത്തിനായി, ജില്ലയില്‍ ആദ്യമായി ജില്ലാ പൊലീസ് അത്‌ലറ്റിക്മീറ്റ് സംഘടിപ്പിക്കാനും കഴിഞ്ഞു. ശാരീരികമായും മാനസികമായും ഉദ്യോഗസ്ഥരുടെ ആരോഗ്യത്തിനായുള്ള പദ്ധതികള്‍ക്ക് പ്രാധാന്യം നല്‍കിയിട്ടുണ്ട്. സുരക്ഷയും അവകാശബോധവും ഉറപ്പാക്കുക എന്ന ലക്ഷ്യത്തോടെ ജില്ലയിലെ അതിഥി തൊഴിലാളികളുടെ വിവരശേഖരണം നടത്തുകയും അവര്‍ക്കായി ബോധവല്‍കരണ ക്ലാസുകളും സംഘടിപ്പിച്ചു. ലഹരിക്കെതിരായ പോരാട്ടത്തിന്റെ ഭാഗമായി വിദ്യാലയങ്ങളില്‍ 'ക്യാമ്പസ് ബീറ്റ്‌സ്' എന്ന പേരില്‍ പ്രത്യേക പദ്ധതി ആവിഷ്‌കരിച്ചു. ചോയ്‌സ് ഓഫ് ലൈഫ് എന്ന പേരില്‍ വിദ്യാഭ്യാസസ്ഥാപനങ്ങളിലുടനീളം ലഹരി, ട്രാഫിക് എന്നീ വിഷയങ്ങളില്‍ ബോധവല്‍കരണ ക്ലാസുകള്‍ സംഘടിപ്പിക്കാന്‍ ഈ കാലയളവില്‍ കഴിഞ്ഞിട്ടുണ്ട്.
കാസര്‍ഗോഡ് കാഞ്ഞങ്ങാട് സ്വദേശിയായ വിഷ്ണുപ്രദീപ് ടി കെ 2018 ബാച്ച് ഐ പി എസ് ഉദ്യോഗസ്ഥനാണ്. പ്രമുഖ അഭിഭാഷകന്‍ ടി.കെ സുധാകരന്റെയും എലിസബത്തിന്റെയും മൂത്ത മകന്‍. ഒറ്റപ്പാലത്ത് എ.എസ്.പി ട്രെയിനി ആയി തുടക്കം. തുടര്‍ന്ന് തലശ്ശേരിയിലും പേരാമ്പ്രയിലും എഎ എസ് പിയായി ചുമതല വഹിച്ച ശേഷം എസ് പി പ്രമോഷനോടെ കെ എ പി നാലാം ബറ്റാലിയനില്‍ കമാണ്ടന്റായി സേവനം അനുഷ്ഠിക്കുമ്പോഴാണ് ഇടുക്കി ജില്ലാ പൊലീസ് മേധാവിയായി നിയമിതനാകുന്നത്. ബി ടെക് - ഐ ടി ബിരുദധാരിയാണ്. 2022 ലെ കുറ്റാന്വേഷണ മികവിനുള്ള സംസ്ഥാന പൊലീസ് മേധാവിയുടെ ബാഡ്ജ് ഓഫ് ഹോണര്‍ പുരസ്‌കാരത്തിനു അര്‍ഹനായിരുന്നു. ഭാര്യ ഡോ .അഞ്ജലി.
കൊല്ലം ജില്ലാ റൂറല്‍ പൊലീസ് മേധാവിയായിട്ടാണ് ടി കെ വിഷ്ണു പ്രദീപിന് സ്ഥലംമാറ്റം ലഭിച്ചിരിക്കുന്നത്. ഇടുക്കിയുടെ പുതിയ പൊലീസ് മേധാവിയായി കെ എം സാബു മാത്യു വ്യാഴാഴ്ച ചുമതലയേല്‍ക്കും.
