ബെംഗളുരു: കര്‍ണാടകത്തിലെ ധര്‍മസ്ഥലയില്‍ ഒട്ടേറെ പെണ്‍കുട്ടികളെ ക്രൂരപീഡനം ചെയ്ത് മറവുചെയ്‌തെന്ന വിവരം പുറത്തുവരുമ്പോള്‍ വര്‍ഷങ്ങള്‍ക്ക് മുന്‍പ് കാണാതായ അനന്യ ഭട്ടും അതില്‍ ഉള്‍പ്പെട്ടിട്ടുണ്ടോയെന്ന സംശയം ഉയരുകയാണ്.
2003-ല്‍ ധര്‍മ്മസ്ഥലയില്‍ നിന്ന് നിഗൂഢമായ സാഹചര്യത്തിലാണ് എംബിബിഎസ് വിദ്യാര്‍ത്ഥിനിയായിരുന്ന അനന്യയെ കാണാതായത്. 22 വര്‍ഷങ്ങള്‍ക്ക് ശേഷവും, അവരുടെ തിരോധാനം രഹസ്യമായി തുടരുന്നു. പെണ്‍കുട്ടിയുടെ കുടുംബത്തിന് ഉത്തരങ്ങള്‍ ലഭിക്കേണ്ടതുണ്ട്. ധര്‍മ്മസ്ഥലയിലെ ഒരു മുന്‍ സാനിറ്റേഷന്‍ തൊഴിലാളിയുടെ ഞെട്ടിക്കുന്ന വെളിപ്പെടുത്തലുകളൂടെ അനന്യ വീണ്ടും ശ്രദ്ധാകേന്ദ്രമാവുകയാണ്.
കാണാതാകുമ്പോള്‍ അനന്യ മണിപ്പാല്‍ കസ്തൂര്‍ബ മെഡിക്കല്‍ കോളേജില്‍ ഒന്നാം വര്‍ഷ എംബിബിഎസ് വിദ്യാര്‍ത്ഥിനിയായിരുന്നു. ബംഗളൂരുവിലെ പദ്മനാഭനഗറില്‍ താമസിച്ചിരുന്ന അവരുടെ അമ്മ സുജാത ഭട്ട്, കൊല്‍ക്കത്തയില്‍ സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷനില്‍ (സിബിഐ) സ്റ്റെനോഗ്രാഫറായി ജോലി ചെയ്യവെ ആയിരുന്നു സംഭവം.
അനന്യ ഭട്ട് തന്റെ കോളേജ് സുഹൃത്തുക്കള്‍ക്കൊപ്പമാണ് ധര്‍മ്മസ്ഥലയില്‍ യാത്രയ്ക്ക് പോയത്. യാത്രയ്ക്കിടെ, സുഹൃത്തുക്കള്‍ ഷോപ്പിംഗിനായി പോയപ്പോള്‍, അനന്യ ക്ഷേത്രം സന്ദര്‍ശിക്കാന്‍ തീരുമാനിച്ചു. എന്നാല്‍, സുഹൃത്തുക്കള്‍ തിരിച്ചെത്തിയപ്പോള്‍ അനന്യയെ കണ്ടെത്താനായില്ല. സുഹൃത്ത് രശ്മി, സുജാത ഭട്ടിനെ ഫോണില്‍ വിളിച്ച് അനന്യയെ കാണാതായതായി അറിയിച്ചു. സിബിഐ ഓഫീസില്‍ ജോലി ചെയ്യുകയായിരുന്ന സുജാത ഉടന്‍ തന്നെ മണിപ്പാല്‍ കോളേജ് ഹോസ്റ്റലുമായി ബന്ധപ്പെട്ടു. എന്നാല്‍, അനന്യയെ രണ്ടോ മൂന്നോ ദിവസമായി കണ്ടിട്ടില്ലെന്നാണ് ഹോസ്റ്റല്‍ അധികൃതര്‍ അറിയിച്ചത്.
കൊല്‍ക്കത്തയില്‍ നിന്ന് ധര്‍മ്മസ്ഥലയിലേക്ക് എത്തിയ സുജാത അനന്യയുടെ ഫോട്ടോയുമായി പ്രദേശവാസികള്‍ക്കും ക്ഷേത്ര ജീവനക്കാര്‍ക്കും ഇടയില്‍ തിരച്ചില്‍ ആരംഭിച്ചു. ചില പ്രദേശവാസികള്‍, ഏതാനും ദിവസങ്ങള്‍ക്ക് മുമ്പ് ക്ഷേത്ര ജീവനക്കാര്‍ ഒരു യുവതിയെ, അനന്യയുടെ ചിത്രവുമായി സാമ്യമുള്ള പെണ്‍കുട്ടിയെ, കൊണ്ടുപോകുന്നത് കണ്ടതായി അറിയിച്ചു. എന്നാല്‍, ബെല്‍ത്തങ്ങാടി പോലീസ് സ്റ്റേഷനില്‍ പരാതി നല്‍കാന്‍ ശ്രമിച്ചപ്പോള്‍, പോലീസ് പരാതി രജിസ്റ്റര്‍ ചെയ്യാന്‍ വിസമ്മതിച്ചു. അനന്യ എന്തെങ്കിലും ആണ്‍സുഹൃത്തുമായി ഒളിച്ചോടിയിരിക്കാമെന്നാണ് പോലീസ് അവരോട് പറഞ്ഞത്.
സാനിറ്റേഷന്‍ തൊഴിലാളിയുടെ വെളിപ്പെടുത്തലിന്റെ പശ്ചാത്തലത്തില്‍, സുജാത ഭട്ട് 2025 ജൂലൈ 15-ന് ദക്ഷിണ കന്നഡ ജില്ലാ പോലീസ് സൂപ്രണ്ട് ഡോ. അരുണിനെ സമീപിച്ച്, അനന്യയുടെ തിരോധാനം വീണ്ടും അന്വേഷിക്കണമെന്ന് ആവശ്യപ്പെട്ട് പുതിയ പരാതി നല്‍കി. അനന്യയുടെ അസ്ഥികള്‍ കണ്ടെത്തി, ഹിന്ദു ബ്രാഹ്‌മണ ആചാരപ്രകാരം അവളുടെ അന്ത്യകര്‍മ്മങ്ങള്‍ യഥാവിധി നടത്താനുള്ള അവസരം തനിക്ക് ലഭിക്കണമെന്നാണ് സുജാത ആവശ്യപ്പെട്ടത്. അവര്‍ പോളിഗ്രാഫ് ടെസ്റ്റിന് വിധേയമാകാന്‍ തയ്യാറാണെന്നും, ധര്‍മ്മാധികാരി വീരേന്ദ്ര ഹെഗ്ഗഡെയും അദ്ദേഹത്തിന്റെ സഹോദരന്‍ ഹര്‍ഷേന്ദ്ര കുമാറിനും പോളിഗ്രാഫ് ടെസ്റ്റ് നടത്തണമെന്നും ആവശ്യപ്പെട്ടു.
സുജാത ഭട്ടിന്റെ പരാതിയില്‍, അനന്യയുടെ തിരോധാനവുമായി ബന്ധപ്പെട്ട് ഗുരുതരമായ ആരോപണങ്ങള്‍ ഉന്നയിക്കപ്പെട്ടിട്ടുണ്ട്. ധര്‍മ്മസ്ഥലയില്‍ എത്തി ക്ഷേത്ര അധികൃതരെ സമീപിച്ചപ്പോള്‍, അവര്‍ തന്നെ അപമാനിക്കുകയും, മകള്‍ ആണ്‍സുഹൃത്തിനൊപ്പം ഒളിച്ചോടിയിരിക്കാം എന്ന് പറഞ്ഞ് പുറത്താക്കുകയും ചെയ്തതായി സുജാത ആരോപിച്ചു. കൂടാതെ, ക്ഷേത്രത്തിലെ ഒരു മുറിയിലേക്ക് തന്നെ കൊണ്ടുപോയി ഭീഷണിപ്പെടുത്തുകയും, ആക്രമിക്കുകയും, തലയ്ക്കടിയേറ്റ് അബോധാവസ്ഥയിലാകുകയും ചെയ്തതായും അവര്‍ ആരോപിക്കുന്നു. ഈ ആരോപണങ്ങള്‍, ധര്‍മ്മസ്ഥലയിലെ ശക്തമായ സ്വാധീനമുള്ള വ്യക്തികളുടെ ഇടപെടലിനെയാണ് സൂചിപ്പിക്കുന്നത്.
മുന്‍ സാനിറ്റേഷന്‍ തൊഴിലാളിയുടെ വെളിപ്പെടുത്തലിനെ തുടര്‍ന്ന്, ധര്‍മ്മസ്ഥലയിലെ കൂട്ടക്കുഴിമാടങ്ങളെക്കുറിച്ചുള്ള അന്വേഷണം ഊര്‍ജ്ജിതമാക്കിയിട്ടുണ്ട്. സുജാത ഭട്ടിന്റെ പരാതിയില്‍ ധര്‍മ്മസ്ഥല പോലീസ് സ്റ്റേഷനില്‍ എഫ്‌ഐആര്‍ രജിസ്റ്റര്‍ ചെയ്തു. കര്‍ണാടക മുഖ്യമന്ത്രി സിദ്ധരാമയ്യ, പോലീസിന്റെ ശുപാര്‍ശയെ അടിസ്ഥാനമാക്കി പ്രത്യേക അന്വേഷണ സംഘം (എസ്‌ഐടി) രൂപീകരിച്ചു. മുന്‍ തൊഴിലാളിയുടെ സുരക്ഷ ഉറപ്പാക്കാന്‍ 2018-ലെ വിറ്റ്‌നസ് പ്രൊട്ടക്ഷന്‍ സ്‌കീമിന് കീഴില്‍ സംരക്ഷണം നല്‍കിയിട്ടുണ്ട്.