തൃശൂർ: ട്രെയിനിൽ ഒറ്റക്ക് യാത്ര ചെയ്യുന്ന സ്ത്രീകളുടെ സുരക്ഷയ്ക്കു വേണ്ടി പാലക്കാട് റെയിൽവേ ഡിവിഷൻ പരിധിയിൽ ‘മേരി സഹേലി’ക്ക് തുടക്കം. ആർ.പി.എഫിന്റെ നേതൃത്വത്തിലാണ് ഇത് നടപ്പിലാക്കുന്നത്. ഇതിന്റെ ഭാഗമായി റെയിൽവേ ഡിവിഷന്റെ പരിധിയിൽ വരുന്ന അഞ്ച് പ്രധാന സ്റ്റേഷനുകളിൽ പ്രത്യേക സംഘങ്ങളെ നിയോഗിച്ചിട്ടുണ്ട്.
ഒറ്റയ്ക്ക് യാത്ര ചെയ്യുന്ന സ്ത്രീകളെ കണ്ടെത്തി, സുരക്ഷാ മുൻകരുതലുകളെക്കുറിച്ച് ബോധവൽക്കരിക്കാനും ആവശ്യമായ സഹായങ്ങൾ നൽകാനും ലക്ഷ്യമിടുന്നതാണ് മേരി സഹേലി പദ്ധതി. യാത്രക്കാരിൽ നിന്ന് അഭിപ്രായ ശേഖരണവും ഇതിലൂടെ നടത്തും.
ഇതിനായി 64 വനിതാ ആർ.പി.എഫ് ഉദ്യോഗസ്ഥരെയാണ് സ്റ്റേഷനുകളിൽ വിന്യസിച്ചിരിക്കുന്നത്. അവർ പതിവായി ട്രെയിനുകളിൽ യാത്ര ചെയ്യും. വനിതാ ഉദ്യോഗസ്ഥരെ സഹായിക്കാൻ പുരുഷ ഉദ്യോഗസ്ഥരും ഒപ്പം ഉണ്ടാകും. ശരീരത്തിൽ ഘടിപ്പിച്ച ക്യാമറകളും സുതാര്യത ഉറപ്പു വരുത്തുന്നതിന് സംഘം ഉപയോഗിക്കും.