വഖഫ് നിയമഭേദഗതിയെ അനുകൂലിച്ചും കേരളത്തെ വിമര്‍ശിച്ചും രാജ്യസഭയില്‍ മന്ത്രി ജോര്‍ജ്ജ് കുര്യന്‍. മുനമ്പത്തില്‍ ബില്ലിനെ അനുകൂലിച്ച് ജനങ്ങള്‍ ആഹ്ലാദപ്രകടനം നടത്തിയെന്നും പ്രധാനമന്ത്രി നരേന്ദ്രമോദിയോടുള്ള നന്ദി അവര്‍ പ്രകടിപ്പിച്ചുവെന്നും അദ്ദേഹം പറഞ്ഞു. മോദിക്ക് മാത്രമേ അവരെ രക്ഷിക്കാന്‍ ആകൂ. സിപിഎമ്മും കോണ്‍ഗ്രസും അവരെ അവിടെ നിന്ന് ഒഴിപ്പിക്കാനാണ് ശ്രമിക്കുന്നത്. മുനമ്പത്തുകാര്‍ക്ക് പിന്തുണ നല്‍കുന്നതുകൊണ്ട് ബിജെപിയെ ഒറ്റപ്പെടുത്താന്‍ ശ്രമിക്കുന്നുവെന്നും അദ്ദേഹം ആരോപിച്ചു.
പിന്നാലെ സഭയില്‍ പ്രതിപക്ഷം ബഹളം വെച്ചെങ്കിലും ജോര്‍ജ് കുര്യന്‍ പ്രസംഗം തുടര്‍ന്നു. സത്യാവസ്ഥ അറിയാവുന്നതുകൊണ്ടാണ് സിബിസിഐയും കെ സിബിസിയും ഈ ബില്ലിനെ പിന്തുണച്ചതെന്നും പോപ്പുലര്‍ ഫ്രണ്ട് ഓഫ് ഇന്ത്യയെ നിരോധിച്ചത് പ്രതിപക്ഷത്തെ അങ്കലാപ്പിലാക്കിയെന്നും അദ്ദേഹം ആരോപിച്ചു. കേരള നിയമസഭ പാസാക്കിയ പ്രമേയം മുനമ്പത്തെ ജനങ്ങള്‍ക്കെതിരെയാണ്. അസംബന്ധമാണ് അര്‍ത്ഥമില്ലാത്ത പ്രമേയം പാസാക്കിയതിലൂടെ കേരള നിയമസഭ ചെയ്തത്. മദനിക്കെതിരെ കേന്ദ്രസര്‍ക്കാര്‍ നടപടിയെടുത്തപ്പോള്‍ അതിനെതിരെ പ്രമേയം പാസാക്കിയവരാണ് കേരള നിയമസഭയിലുള്ളതെന്നും അദ്ദേഹം പറഞ്ഞു.
അദ്വാനിയെ കൊല്ലാന്‍ ശ്രമിച്ച തീവ്രവാദിയാണ് മദനി. മതേതരതത്തെ കുറിച്ചും മതപരമായ അവകാശങ്ങളെ കുറിച്ചും ഒരുപാട് സംസാരിച്ചവരാണ് കേരളത്തിലെ എംപിമാര്‍. ഡിവൈഎഫ്‌ഐയും എസ്എഫ്‌ഐയും ചേര്‍ന്ന് ക്രിസ്മസ് കരോളിനെ കേരളത്തില്‍ ആക്രമിച്ചുവെന്നും കോട്ടയത്ത് നടന്ന ആക്രമണം ഉയര്‍ത്തിക്കാട്ടി ജോര്‍ജ് കുര്യന്‍ പറഞ്ഞു.
വടക്കേ ഇന്ത്യയില്‍ എന്തൊക്കെയോ സംഭവിക്കുന്നു എന്ന് സിപിഎം പറയുന്നു. കേരളത്തില്‍ എന്താണ് സംഭവിക്കുന്നത് എല്ലാവരും അറിയണമെന്നും ഇടുക്കി ബിഷപ്പ് ഹൗസ് ആക്രമണം ഉയര്‍ത്തി ജോര്‍ജ് കുര്യന്‍ പറഞ്ഞു. തുടര്‍ന്ന് സഭയില്‍ വന്‍പ്രതിപക്ഷ ബഹളമുണ്ടായതോടെ ശാന്തരാകണമെന്ന് രാജ്യസഭാ ചെയര്‍മാന്‍ ആവശ്യപ്പെട്ടു.
പാലാ ബിഷപ്പ് ഹൗസ് പി എഫ് ഐ ആക്രമിച്ചപ്പോള്‍ മിണ്ടാതിരുന്നവരാണ് കേരളത്തിലെ കോണ്‍ഗ്രസുകാരെന്നും ജോര്‍ജ് കുര്യന്‍ പറഞ്ഞു. കേരളത്തിലെ മുസ്ലീങ്ങളെ ഇടതും വലതും തെറ്റിദ്ധരിപ്പിക്കുകയാണ്. ക്രിസ്ത്യന്‍ വോട്ട് കിട്ടിയതുകൊണ്ടാണ് തൃശ്ശൂരില്‍ സുരേഷ് ഗോപി ജയിച്ചത്. എസ്എഫ്‌ഐ പ്രവര്‍ത്തകന്‍ അഭിമന്യുവിന്‍നെ കൊലപ്പെടുത്തിയത് പി എഫ് ഐക്കാരാണ്. ഇവരെ നിരോധിച്ചതോടെ കോണ്‍ഗ്രസും സിപിഎമ്മും സങ്കടത്തിലാണെന്നും ജോര്‍ജ് കുര്യന്‍ പറഞ്ഞു
