ലോകമെമ്പാടുമുള്ള 16,000 ഉദ്യോഗസ്ഥരെ പിരിച്ചുവിടാനൊരുങ്ങി ആഗോള ഭക്ഷ്യ ഭീമനായ നെസ്ലെ. അടുത്ത രണ്ട് വര്‍ഷത്തിനുള്ളില്‍ പിരിച്ചുവിടുമെന്നാണ് കമ്പനി പ്രഖ്യാപിച്ചിരിക്കുന്നത്. കമ്പനിയുടെ ആകെ ജീവനക്കാരിലെ ആറ് ശതമാനത്തോളം പേരെയാണ് പിരിച്ചുവിടുന്നത്.
പ്രഖ്യാപനത്തിന് പിന്നാലെ കമ്പനിയുടെ ഓഹരിവില കുതിച്ചുയര്‍ന്നു. ലോകം മാറിക്കൊണ്ടിരിക്കുകയാണെന്നും നെസ്ലെ വേഗത്തില്‍ മാറേണ്ടതുണ്ടെന്നും ചീഫ് എക്‌സിക്യൂട്ടീവ് ഫിലിപ്പ് നവ്രാറ്റില്‍ മുമ്പ് പ്രസ്താവനയില്‍ വ്യക്തമാക്കിയിരുന്നു. ജീവനക്കാരുടെ എണ്ണം കുറയ്ക്കുക എന്ന തീരുമാനം കഠിനമാണെന്നും എന്നാല്‍ ആവശ്യമായ തീരുമാനങ്ങള്‍ എടുക്കാതെ വഴിയില്ലെന്നും അദ്ദേഹം പറഞ്ഞിരുന്നു.
പിരിച്ചുവിടലിലൂടെ ഒരു ബില്യണ്‍ സ്വിസ് ഫ്രാങ്കിന്റെ ലാഭമാണ് കമ്പനി ലക്ഷ്യംവെക്കുന്നത്. 2027 അവസാനത്തോടെ സമ്പാദ്യം മൂന്ന് ബില്യണ്‍ സ്വിസ് ഫ്രാങ്കായി ഉയര്‍ത്തുകയാണ് ലക്ഷ്യമെന്ന് ഫിലിപ്പ് നവ്രാറ്റില്‍ വ്യക്തമാക്കി.