യെമനില്‍ ജയിലില്‍ വധശിക്ഷ കാത്തുകഴിയുന്ന മലയാളി നഴ്‌സ് നിമിഷ പ്രിയ ജയില്‍ മോചിതയാകുമെന്ന എന്ന ഡോ. കെ എ പോളിന്റെ വീഡിയോയ്ക്ക് എതിരെ കൊല്ലപ്പെട്ട തലാലിന്റെ സഹോദരന്‍. കെഎ പോള്‍ പറഞ്ഞതെല്ലാം നുണയാണെന്ന് അബ്ദുല്‍ ഫത്താഹ് മെഹ്ദി ഫേസ്ബുക്ക് പോസ്റ്റില്‍ പറഞ്ഞു. കേസില്‍ വിട്ടുവീഴ്ച ചെയ്യില്ലെന്നും ശിക്ഷ നടപ്പാക്കണമെന്നും അദ്ദേഹം ആവശ്യപ്പെട്ടു.
കഴിഞ്ഞ ദിവസമാണ് ഇവഞ്ചലിസ്റ്റും ഗോബല്‍ പീസ് ഇനീഷ്യേറ്റീവ് സംഘടനയുടെ സ്ഥാപകനുമായ ഡോ. കെ എ പോള്‍ നിമിഷ പ്രിയ ജയില്‍ മോചിതയാകുമെന്ന് വ്യക്തമാക്കി സമൂഹമാധ്യമമായ എക്സില്‍ വീഡിയോ പങ്കുവച്ചത്. ഇദ്ദേഹത്തിന്റെ തന്നെ പേരിലുള്ള അക്കൗണ്ട് വഴി പ്രചരിപ്പിച്ച വീഡിയോയില്‍ കെഎ പോള്‍ തന്നെയാണ് വിഷയം വിശദീകരിച്ചത്. ഒരുപാടാളുകള്‍ക്ക് നന്ദി പറഞ്ഞുള്ളതാണ് വീഡിയോ. ഇതിന് പിന്നാലെയാണ് കൊല്ലപ്പെട്ട തലാലിന്റെ സഹോദരന്‍ രംഗത്ത് വന്നത്. ഫെയ്‌സ്ബുക്കിലാണ് പോസ്റ്റ്. ശിക്ഷ നടപ്പാക്കലാണ് ആവശ്യം. അതിനായി കാത്തിരിക്കുകയാണെന്നും അദ്ദേഹം പറയുന്നു. വിവിധ വിഷയങ്ങളില്‍ വിവിധ ഗ്രൂപ്പുകള്‍ ഉന്നയിച്ച നിലപാടുകള്‍ വീണ്ടും വീണ്ടും തള്ളുകയാണ് മെഹ്ദി.
