ഇന്‍റര്‍നെറ്റ് ബ്രൗസിംഗ് രംഗത്തും ആര്‍ട്ടിഫിഷ്യല്‍ ഇന്‍റലിജന്‍സ് പിടിമുറുക്കുന്നു. ആര്‍ട്ടിഫിഷ്യല്‍ ഇന്‍റലിജന്‍സ് രംഗത്തെ പ്രധാനികളിലൊന്നായ ഓപ്പണ്‍എഐ, എഐ അധിഷ്‌ഠിത ബ്രൗസര്‍ ആഴ്‌ചകള്‍ക്കുള്ളില്‍ പുറത്തിറക്കും. ഗൂഗിളിന്‍റെ ഏറ്റവും പ്രചാരമുള്ള ക്രോം ബ്രൗസറിനെ വീഴ്ത്തുക ലക്ഷ്യമിട്ടാണ് ഓപ്പണ്‍ എഐ ഈ എഐ ബ്രൗസര്‍ ഒരുക്കുന്നത്.
ഓപ്പണ്‍എഐ അവരുടെ സ്വന്തം എഐ അധിഷ്‌ഠിത ബ്രൗസര്‍ വരും ആഴ്‌ചകളില്‍ പുറത്തിറക്കും. ബ്രൗസര്‍ വിപണിയില്‍ ഗൂഗിള്‍ ക്രോമിനുള്ള മേധാവിത്വം തകര്‍ക്കുകയാണ് ഓപ്പണ്‍എഐയുടെ ലക്ഷ്യം. ചാറ്റ്‌ബോട്ടുകള്‍ക്കും മറ്റ് എഐ ടൂളുകള്‍ക്കും അപ്പുറത്തേക്ക് ഇന്‍റര്‍നെറ്റില്‍ സ്ഥാനമുറപ്പിക്കാനാണ് ഓപ്പണ്‍എഐയുടെ ശ്രമം. ഓരോ വെബ്‌സൈറ്റുകളിലേക്കും ചൂണ്ടുപലകയാവുന്ന പരമ്പരാഗത ബ്രൗസറുകള്‍ക്ക് പകരം എഐ നിയന്ത്രിക്കുന്ന, എഐ ചോദ്യങ്ങള്‍ പ്രോസസ് ചെയ്യുകയും വേഗത്തിലും എളുപ്പത്തിലും ഉത്തരം നല്‍കുകയും ചെയ്യുന്ന പ്ലാറ്റ്‌ഫോമായിരിക്കും ഓപ്പണ്‍എഐയുടെ പുത്തന്‍ ബ്രൗസര്‍. ചാറ്റ്‌ജിപിയില്‍ ചാറ്റ് ചെയ്യുന്നത്ര ലളിതമായി ഈ ബ്രൗസറില്‍ ടാസ്‌കുകള്‍ ചെയ്യാനാകും. ടിക്കറ്റുകള്‍ ബുക്ക് ചെയ്യാനും, ഫോമുകള്‍ പൂരിപ്പിക്കാനും, വെബ് പേജുകള്‍ സംഗ്രഹിക്കാനുമെല്ലാം ബ്രൗസര്‍ വിടാതെതന്നെ കഴിയും. ബ്രൗസറുകളില്‍ അനേകം ടാബുകള്‍ ഓപ്പണാക്കി വെക്കുന്ന പതിവ് രീതിക്ക് വിരാമമിടാന്‍ ഇതുവഴിയാകും.
ഗൂഗിള്‍ ക്രോമിനും മൈകോസോഫ്റ്റ് എഡ്‌ജിനും ഒപ്പേറയ്ക്കും കരുത്തേകുന്ന ഓപ്പണ്‍-സോഴ്‌സ് കോഡായ ക്രോമിയത്തില്‍ തന്നെ തയ്യാറാക്കുന്ന ഈ ബ്രൗസര്‍ ഉപഭോക്താക്കള്‍ക്ക് സുപരിചിതമായ വെബ്‌സൈറ്റുകളും എക്‌സ്‌ടെന്‍ഷനുകളും പിന്തുണയ്ക്കും. എഐ കൂടുതല്‍ വ്യക്തിഗതമായ സെര്‍ച്ച് ഫലങ്ങളും വിവരങ്ങളും യൂസര്‍മാര്‍ക്ക് നല്‍കും.
ആഗോള ഇന്‍റര്‍നെറ്റ് ബ്രൗസിംഗ് വിപണിയുടെ മൂന്നിലൊന്നും കൈകാര്യം ചെയ്യുന്നത് ഗൂഗിള്‍ ക്രോമാണ്. ഗൂഗിളിന്‍റെ പരസ്യ, ട്രാഫിക് മേഖലകളുടെ പ്രധാന സോഴ്‌സ് ഈ സെര്‍ച്ച് എഞ്ചിനാണ്. യൂസര്‍മാരുടെ എണ്ണത്തില്‍ ക്രോമിനെ വെല്ലുവിളിക്കാന്‍ ചുരുങ്ങിയ കാലം കൊണ്ട് ഓപ്പണ്‍എഐയുടെ എഐ ബ്രൗസറിന് കഴിഞ്ഞാല്‍ അത് ഗൂഗിളിന്‍റെ പ്രധാന വരുമാന ശ്രോതസിനെ തന്നെ പ്രതികൂലമായി ബാധിക്കും.
ഇന്‍റര്‍നെറ്റ് സെര്‍ച്ച് രംഗത്ത് ഗൂഗിളിന്‍റെ അപ്രമാദിത്വം അവസാനിപ്പിക്കുക ലക്ഷ്യമിട്ട് സ്റ്റാര്‍ട്ടപ്പ് കമ്പനിയായ പെര്‍പ്ലെക്സിറ്റി എഐ അടുത്തിടെ 'കോമറ്റ്' എന്ന പേരില്‍ സ്വന്തം എഐ വെബ് ബ്രൗസര്‍ അവതരിപ്പിച്ചിരുന്നു. എജന്‍റിക് എഐ കരുത്തോടെയാണ് കോമറ്റ് വെബ് ബ്രൗസര്‍ രൂപകല്‍പന ചെയ്തിരിക്കുന്നത്. ചോദ്യങ്ങള്‍ക്ക് ഉത്തരം നല്‍കുക മാത്രമല്ല, നിങ്ങള്‍ക്കായി ജോലികള്‍ ചെയ്യാന്‍ കഴിയുന്ന ഏജന്‍റ് എന്ന നിലയിലാണ് കോമറ്റിനെ അവതരിപ്പിച്ചിരിക്കുന്നത് എന്നാണ് പെര്‍പ്ലെക്സിറ്റി പറയുന്നത്. കോമറ്റിലേക്ക് പെര്‍പ്ലെക്സിറ്റി എഐയെ നേരിട്ട് സംയോജിപ്പിച്ചിരിക്കുന്നതിനാല്‍ ഉപഭോക്താക്കള്‍ക്ക് വിവര്‍ത്തനം ചെയ്യാനും സംഗ്രഹിക്കാനുമൊക്കെ ബ്രൗസറിനുള്ളില്‍ വച്ച് തന്നെ കഴിയും. എഐ ബ്രൗസര്‍ രംഗത്തേക്ക് ഓപ്പണ്‍എഐയും വരുന്നതോടെ പുതിയ മത്സരതലം തുറക്കും
